Аҧсны Аҳәынҭқарра Ахада

 

Ахада иажәахәқәа

13.05.2016

Аҧсны аҳәынҭқарра ахада Рауль Ҳаџьымба аҳәынҭқарратә бызшәа аҿиаразы акомиссиа актәи аилатәараҟны иқәгылара

Аҟәа, 16.00

Аҧсны аҳәынҭқарра ахада Рауль Ҳаџьымба аҳәынҭқарратә бызшәа аҿиаразы акомиссиа актәи аилатәараҟны иқәгылара.

*  *  *

Ҳаҭыр зқәу ҳинтеллигенциа– аҳәынҭқарратә комиссиа алахәылацәа!  

Иахьатәи ҳаиқәшәара, ҳаицәажәара – даҽа шьаҿакны иацлоит ҳазегь хьаас иҳамоу, иуадаҩу абызшәатә ситуациа арҽеира, арыҕәҕәара аусаҿы. Уи ус шакәу агәра згоит, избанзар ари  акомиссиа еиднакылоит ҳаҭыр зқәу ҳҵарауаа, ҳашәҟәыҩҩцәа, аҳәынҭқарратә бызшәа апроблема хаҭала, ҳәынҭқарратә уалҧшьала иазааигәоу ачынуаа, анапхгаҩцәа. Шәарҭ шәыхшыҩ еилаҵаны, ихадароу амҩақәа азгәашәҭар – хымҧада иҟалоит алыҵшәагьы.

Имариаӡам ҳҿаҧхьа иқәгылоу азҵаарақәа. Аха урҭ ҳамч рықәхартә иҟоуп. Сынтәа еиҭашьақәыргылахеит Урыстәылаҟа еиҳау аҵараиурҭақәа рахь зхы зырхо абитуриентцәа аҳәынҭқарратә бызшәазын аҧышәара  рахыжьра. Уи, сгәанала, ҳбызшәа аҳаҭыр шьҭызхуа факторуп. Аҭаацәареи,  ашколхәыҷқәеи, арҵаҩцәеи рҭакҧхықәра шьҭызхуа шьаҿақәоуп ҳәа сгәы иаанагоит аҧсуа бызшәеи алитературеи рдырра арҵауларазын Аҧсны аҵара аминистрра  аҧсуа школқәа рҿы иаланагало аҧышәарақәа. Иааиуа ашықәсазын уи асистема алагалахоит егьырҭ амилаҭтә школқәа рҿгьы. Ари иацәшәатәӡам, алеишәа ҟамлакәа– иуадаҩхоит зыда ҧсыхәа ҳамам ҳаҧсуа бызшәа амчхареи амҽхаки рырҭбаара.

Акультура аминистрраҿы ааигәа ирыдыркылаз, уаанӡатәи аиҳабыра иаҧшьыргахьаз, иналыукааша аҧсуа поет Таиф Аџьба ихьӡ зхыу апремиа, - шьаҿа бзиоуп, аха уи  ақьаадаҿы инымхароуп, уи иҵегь аӡбахә цәыргатәуп амассатә информациа ахархәагақәа рҿы, аҧсуа бызшәеи алитературеи рӡыргараҿы  уи ароль акырӡа иҕәҕәахарцазын.

Уаҩы игәы иахәартә иҟоуп Аҧснытәи аҳәынҭқарратә филармониаҿы, егьырҭ  аусбарҭақәа рҿы имҩаҧысуа амассатә усмҩаҧгатәқәа реиҳарак ҧсышәала иахьымҩаҧысуа. Аха уи атрадициа иазырҳалатәуп, иацәхьаҵтәым. Аҳәынҭқарратә телехәаҧшреи арадиои рҿы аҧсуа бызшәа еснагь аҧыжәара амазароуп, избанзар урҭ ихадароу инструментқәоуп абызшәа аларҵәараҿы. Урысшәала иҭыҵуа акьыҧхьтә ҭыжьымҭақәагьы ирхадмыршҭыроуп иахьҭыҵуа ҳтәылаҿы шакәу. 

Ижәдыруазарц сҭахыуп, Аҧсны атәылауаҩра аиуразын аҧсуа бызшәа адырра хымҧадатәуп ҳәа Азакәан иану аҧҟара уаанӡа аасҭа идырџьбаро ишалагаз. Иззымдыруа ирҵарцазын, акомиссиа ҷыда шықәсыбжак ҿҳәарас ирынаҭоит. Ари згәамыҧхо маҷҩым, аха урҭгьы лабҿаба ирбароуп, аҧсуа паспорти атәылауаҩреи роурц азын, маҷк аџьабаагьы шбатәу, аҳәынҭқарра зықәныҟәо аҧҟарақәа,  азинтә традициақәа  ҳаҭыр шрықәҵатәу. 

Ҳар ибзианы еилаҳкаауеит ҳбызшәа алахьынҵеи- ҳаҧсадгьыл алахьынҵеи еидыхшьа, еиҟәыҭхашьа шрымам. Шәызегь шәымчала, аҳәынҭқарратә бызшәа азы азакәан иацназго апрограммагьы аус адулахароуп. Уи апрограммаҿы ихадароу аҭыҧ ааннакылароуп аҧсуа школ ҵакылагьы формалагьы ишаҧсыуа школу узырбаша арҵаратә система. Уи уажәы хаҭала лнапы алакыуп Аҧсны Ахада ицхырааҩ, афилологиатә ҭҵаарадыррақәа ркандидат Ҭали Џьапуаҧҳа. Сгәанала, аиҭазыхынҳәра иаҧсоуп Аҧсны аҳәынҭқарра ашьаҭаркҩы Владислав Арӡынба ихаан иаҧҵаз  аҧышәа ду змаз апедагог, аҵарауаҩ Иван Асаӡба инапхгарала ишьақәыргылаз, насгьы Аҧсны Ахада иусҧҟала ишьақәырҕәҕәаз аҧсуа школ аҿиара Аконцепциа. Уи рҿыцтәызар– ирҿыцтәуп, аха иара еидызкыло ашьагәыҭ, ҳҵарауаа изларҳәо, ала актуалра шамац иаанхоит.

Инаҵшьны иазгәасҭарц сҭахыуп апринципра злоу даҽа знеишьакгьы: ҳаҧхьаҟа ачынуаҩрахь, аҳәынҭқарратә маҵзурахьы зхы зырхо дарбанзаалакь идыруазароуп ихымҧадатәу, высшьа змам ҧҟараны ишыҟало аҳәынҭқарратә бызшәа адырра, ахархәара. Иҟоуп Аконституциа, иҟоуп азакәан, уи аилагара азин имам аӡәгьы.

Иахьа иҳамоуп аҧсуа бызшәа аҿиара иазкыу Аҳәынҭқарратә фонд. Уи иахьанӡа имҩаҧнаго аусура,– ахәҷтәы литература аҭыжьра, аларҵәаратә цхыраагӡақәа, ателехәаҧшратә хәыҷтәы проектқәа, убас егьырҭ ацхыраагӡақәа,–  азеиҧштә бызшәатә стратегиа иахәҭакыуп.  Аха уажәшьҭа апарламенти аиҳабыреи есышықәса иазгәарҭо ахарџьқәа реихшара алҳаршароуп  абызшәа аҿиара априоритет хадақәа зегьы ҳасаб рзуны, арҵага шәҟәқәа рырҿыцра, ахәыҷ баҳчақәа рзы ааӡагатә мыруга ҿыцқәа уҳәа убрахь иналаҵаны. Иҵегь рыҩаӡара ҳаракхароуп аҧсуа бызшәа арҵара акурсқәа, уахь аныҟәара иалаҳаргароуп  зхатәы бызшәазын здырра ҧсыҽу ачынуаагьы, – Ахада иадминистрациеи Аминистрцәа Ркабинети раҧхьа инаргыланы.Ишьҭаҳхроуп урҭ акурсқәа ирыдҳаҧхьалоу арҵаҩцәа рматериалтә интерес. Ирацәахароуп абызшәа аларҵәара иазкыу, уи аҵара, адырра, уи ала ацәажәара, аҿар иргәаҧхартә, иазҿлымҳахартә иҟазҵо, агьама ҳарак зныҧшуа апроектқәа. Урҭ рышҟа рымҩа аатхароуп аҟыбаҩ бзиа змоу аспециалистцәа ҿарацәа. Азеиҧш бызшәатә программаҿы аҭыҧ ҷыда аиуроуп аҳәаанырцәтәи ҳадиаспора  ирызкыу ахырхарҭақәа. 

Сара сацәымҩашьо агәрагара сымоуп, абызшәатә ҳәынҭқарратә программа бзиа ацәыргашьа ҳанақәшәа, аҳәынҭқарра ишалшо етап-етапла уи анагӡаразын иаҭахыу ахарџьқәагьы. 

Ҳарзыҧшуп иахьа абри аилатәара иалахәу зегьы шәыцхыраара, шәажәа, шәҳәоу, шәидеиақәа. Аиҳабыреи апарламенти аинтеллигенциеи ари азҵаараҿы реилибакаара  иабзоуроу даара ирацәоуп.Гәык-ҧсыкала ишәзеиҕьасшьоит агәамч-ҕәҕәа, аманшәалара, агәалаҟара бзиа, ҧхьаҟатәи аихьӡара ҿыцқәа!

Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org