Аҧсны Аҳәынҭқарра Ахада

Ахада Рауль Ҳаџьымба Пицунда инхо ауааҧсыра дырҧылеит.

Аиҧылара иалахәын Жәлар Реизара Аиҳабы Валери Бганба, Акурортқәеи атуризми рзы аминистр Авҭандил Гарцкиа, Гагра араион аусбарҭа ахада Беслан Барцыц, Жәлар Реизара адепутат Беслан Гәбаз, Пицунда ақалақь аусбарҭа ахада Чингиз Бигәаа.

Аиҧылара аартуа, Чингиз Бигәаа далацәжәеит Пицунда инхо ауааҧсыра ирымоу акоммуналтәи асоциалтә-економикатәи проблемақәа. Уи иазгәеиҭеит, Пицунда ақалақьи Гагра араиони рбиуџьет еизыҟазаашьақәа реиҭакра аҵак ду шамоу, иагьрыдигалеит ақалақь аусбарҭа акадртә политикаҟны ақалақьтә еизара ароль арҕәҕәара.

«Пицунда есқьынгьы ҳара бырлаш ҳасабла иҳаман, уи алшара дуӡӡақәа амоуп, аха рыцҳарас иҟалаз, инагӡаны ахархәара амаӡам», - абри аҵшьны иазгәеиҭеит Ахада иқәгылара алагамҭазы. Уи иара убас иеизаз иреиҳәеит, иҟаиҵаз адҵала ақалақьи акурорттә комплекси ирымоу апроблемақәа раарҧшреи рыҭҵаареи рзы ҷыдала аусуратә гәыҧ шаҧҵоу. Агәыҧ аусура иалагеит, хара имгакәа уи ажәалагалақәа цәырнагараны иҟоуп.

Атәыла ахада иазгәеиҭеит, ҳхатәы економика аҿиареи ҳбиуџьет аҩныҵҟатәи ахыҵхырҭақәа реизырҳареи аҵак ду шамоу. Иара иаҵшьны иҳәеит афинанстә уадаҩрақәа шыҟоугьы, аҳәынҭқарра абиуџьетуаа руалафқәа рыцҵаразы ахы иаднаҵаз анагӡара иашалагахьоу раионқәак рыҟны – Гагратәигьы налаҵаны – ҳазҭалаз ашықәс инаркны ауалафахәы иацҵаны аужьра ишалагахьоу, насгьы уи Урыстәылатәи Афедерациа иҟанаҵо ацхыраарала акәымкәа, ҳхатә хархәагақәа рыла шакәу.

Рауль Ҳаџьымба иара убас иҳәеит, Акурорт “Пицунда”апансионатқәа реидкыла аҭиразы иҟоу ауҳәан-сҳәанқәа шиашам. «Ҳара аҳәынҭқарратә мазара, еиҳаракгьы, ҳбиуџьет ахашәала алазгало, аимҵәара азин ҳамаӡам », - иҳәеит Ахада.

Ахада иара убас далацәажәеит Пицундатәи Аныхабаа инадҳәаланы иҟоу аҭагылазаашьа. «Ари аныхабааи аоргани еицырдыруеит аҟаза ахә ҳаракны изшьо аӡәырҩы Аҧснеиҧш хара уи анҭыҵгьы. Аныха иқәнаргыло азҵаарақәагьы ҳасаб рзутәуп, Пицундатәи Аныха ижәытәӡатәи иашахаҵаратә ныхоуп. Зинла аконцерттә зал Акультуреи аҭоурых-культуратә ҭынха ахьчареи рзы аминистрра абаланс аҟны иҟоуп. Сара аорган инамаданы иарбанзаалак зыӡбак ашьҭыхраан Пицунда ақалақь аҟны инхо ауааҧсыра ргәаанагара ҳасаб азутәуп ҳәа сгәы иаанагоит», - иҳәеит Ахада.