Аҧсны Аҳәынҭқарра Ахада

 

Ахада усуратә ныҟәарала Аҟәа ақалақь далсны ибеит

02.11.2023

Ахада усуратә ныҟәарала Аҟәа ақалақь далсны ибеит

Аԥсны Аҳәынҭқарра Ахада Аслан Бжьаниа  Аҟәа ақалақь аҟны аусуратә ныҟәарақәа мҩаԥигеит. Аныҟәарақәа ирылахәынАхада Иадминистрациа Анапхгаҩы Абесалом Кәарҷиа, Аҟәа ақалақь Администрациа Ахада Беслан Ешба.

Аныҟәарақәа рҳәаақәа ирҭагӡаны аҳәынҭқарра Ахада ибеит Арӡынба имҩаду аҟны Агәмааи Титовеи амҩақәа еимадзо аҭыԥқәа рыҟны аиҭашьақәыргыларатә усурақәа шцо.

Беслан Ешба иҳәеит, арҭ амҩадукәа рыҟны аиҭашьақәыргыларатә усурақәа шцо ақалақь Администрациа ахарџь ала, иагьшхыркәшахо ашықәс анҵәамҭазы.  "Амҩа даара аҭагылазаашьа бааԥсын. Ауаа рацәаҩны инхоит, амҩа иахыкәшан ицалар акәын,  иԥҽыз амҩа иҭамҳарц азы ",-иҳәеит Ешба.

Иара убас, Ахада иеиҳәеит арҿыцратә усурақәа анцоз аамҭазы аӡӡымҩангара шәырақәа шыԥсахыз, ари аусурахкы иартәеит 38 млн.мааҭ. Аԥхьаҟа иазԥхьагәаҭоуп - амҩа акаҭран ақәырҭәара, уи иақәхарџьтәхоит 15-18 млн.мааҭ. " Аԥара ҳамоуп. Аканализациа иадҳәалаз аус цгьан, аҭыбгарақәа рацәан аус аԥырхага азҭоз", - иҳәеит иара. Ешба еиҭеиҳәеит, ԥхынгәымзазы излагаз аусурақәа  жәамш рыла ишхыркәшахо.

Анаҩс Ахада ибеит Т. Шамба ихьӡ зху апарк аҟны имҩаԥысуа аусурақәа. Аусурақәа рымҩаԥысшьа зеиԥшроу еиҭеиҳәеит Беслан Ешба. "Индоевропатәи ателеграф 12 ҭоурыхтә шьаҟа ареставрациа рзаҳуит. Иаарласны 80 цыра атәарҭақәа  ҳаргылоит", - иҳәеит Аҟәа Администрациа Ахада.

Амуниципалтә усбарҭа "Ақалақьргыларапроект" адиректор Асҭамыр Ԥиԥиа иажәақәа рыла, апарк аҟны иҟоу аӡыршә аиҭашьақәыргылара уажәшьҭа ахыркәшарахь инеиуеит.  " Аусурақәа цонаҵы аӡыршә иамаз раԥхьатәи ахаҿра аиқәырхара ҳашьҭан. Аусурақәа хыркәшахоит  абҵарамза 17-нӡа",-иҳәеит Ԥиԥиа.

Беслан Ешба иҳәеит, иааиуа ашықәс азы апарк аҟны ишыҟало ауаргьала аҳәыҷқәа рзы акьанџьа дуқәеи.

Анаҩс Аслан Бжьаниа даҭааит Басла аӡиас иху ашьапыламҩатә цҳа. Беслан Ешба иҳәеит, ацҳа ахи аҵыхәеи рыҟны алифтқәа раҭара ргәы ишҭоу. "Апандус ахьамам иахҟьаны, зымаха-зышьаха зыхьуа ауаа ацҳа изықәсӡом, иара убас ашьаҟауаа ахәыҷтәы колиаскақәеи амаланыҟәақәеи змоу", - иҳәеит Ешба. Аслан Бжьаниа алифтқәа рышьақәыргылара дақәшаҳаҭхеит, атәылауааи асасцәеи рзы акырӡа ишаҭаху азгәаҭаны. Ацҳа ҿыц аҟны алифт шьақәыргылахоит 2024-тәи ашықәс алагамҭазы.

Анаҩс Ахада Ацҳа ҟаԥшь дахәаԥшны ибеит. Ақалақь Администрациа Ахада иҳәеит, арҿыцратә усурақәа раԥхьа аҭыџьтәы кәырша шамамыз. Иахьатәи амш азы аусурақәа зегьы хыркәшоуп, амаакырақәа еиҭашьақәыргылоуп.

Анаҩстәи аыҟәарақәа ирыцҵан агәаҭарҭатә ҭыԥи Аҟәатәи ашьхаҿы иҟоу аӡыршәи рыҟны.  Асҭамыр Ԥиԥиа Аслан Бжьаниа адырра ииҭеит актәи агәаҭарҭатә ҭыԥ аҟны аусурақәа шцо. "Ахыб  аевкалипт ҵла ақәҳаит, уи апроблема аԥаҳхит, уажәшьҭа аусурақәа ахыркәшарахь инеиуеит", -иҳәеит иара, убри аан иазгәеиҭеит абҵарамза анҵәамҭазы  актәи агәаҭарҭатә ҭыԥ аҟны аусурақәа зегьы шхыркәшахо.

Аҳәынҭқарра Ахада изеиҭеиҳәеит Аҟәатәи ашьхаҿы аӡыршә ааха ӷәӷәа шамаз, аха аиҭашьақәыргылара шрылшаз. Аӡыршә арҿыцра, иара иажәақәа рыла, ашықәс анҵәамҭазы ихыркәшахоит, апарк акәзар идырԥшӡоит, еиҿыркаауеит.

Ахада иара убас, Аҟәа амикрораион ҿыц аҟны аусурақәа рцашьа гәеиҭеит. Ара Агрба имҩаду апарк хадаҟны аиҭашьақәыргыларатә усурақәа мҩаԥган, ишьҭаҵан атротуартә хаҳәцәқәеи акаҭрани, еиҭашьақәыргылан ауаажәларратә трансорт аангыларҭақәа.

Анаҩс Ахада Аҟәатәи аихамҩатә вокзал даҭааит. Аԥснытәи Аихамҩа анџьныр хада    Леонид Кәыруа Ахада адырра ииҭеит имҩаԥгоу аиҭашьақәыргыларатә усурақәа рзы.   «Авокзал аҩныҵҟеи адәахьи иаҳрыцқьеит – агәам-сам дәылаҳгеит. Ашә ҿыцқәа шьақәҳаргылеит, аԥенџьырқәа ҿаҳҵеит, абагьырқәа ҳарҿыцит», иҳәеит Ҟәыруа.

Иара убас уи иҳәеит аибашьра аахыс ахыбра ахыб абжа шамам. Иазԥхьагәаҭоуп авокзал ахыбра 2024 шықәса аԥхынранӡа аиҭашьақәыргылара, апассаџьырцәа рымҩангара иалагаанӡа азыԥшырҭа зал аиҭашьақәыргылара.  «Аусурақәа зегьы мҩаԥысуеит Акультура аминистрра абжьгарақәа рықәныҟәарала авокзал ахыбра аҭоурых-культуратә ҭынха аобиектқәа ирыҵанакуеит аҟнытә», - иҳәеит иара.

Ахада иазгәеиҭеит Аҟәатәи авокзал аиҭашьақәыргылара – иҿио ауаажәларра символра шазнауа.  «Ари иара авокзал мацара иахьазеиӷьу адагьы, ҳтәылауаагьы ргәы иахәоит. Уи ҳуаажәларра рыҿиара иасимволуп. Шәара аҵыхәтәантәи ҩажәижәаба шықәса раахыс абгара иаҿыз аобиект аиқәырхара шәылшеит. Иҭабуп ҳәа шәасҳәоит ари азы», - иҳәеит иара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org