Аҧсны Аҳәынҭқарра Ахада

 

Аслан Бжьаниа Аҟәа ақ. Жәларбжьаратәи аҳаиртә баӷәаза аиҭашьақәыргыларазы Аиқәшаҳаҭра аҵаҩра иазкыз ацеремониа далахәын

27.10.2023

Аслан Бжьаниа Аҟәа ақ. Жәларбжьаратәи аҳаиртә баӷәаза аиҭашьақәыргыларазы Аиқәшаҳаҭра аҵаҩра иазкыз ацеремониа далахәын

Иахьа, жьҭаарамза 27 рзы имҩаԥысит Аԥсны Ахада Аслан Бжьаниа дызлахәыз В. Г. Арӡынба ихьӡ зху Жәларбжьаратәи аҳаиртә баӷәаза аиҭашьақәыргыларазы Аиқәшаҳаҭра аҵаҩра.

Аԥсны Аҳәынҭқарра Аиҳабыреи ЗҲӘА "Аинфрастуктуратә ҿиареи" аҳәынҭқарратә-хатәы усеицуразы Аиқәшаҳаҭра рнапы аҵарҩит. Аиқәшаҳаҭра хықәкыс иаиуит В. Г. Арӡынба ихьӡ зху Жәларбжьаратәи аҳаиртә баӷәаза "Аҟәа" амазаратә комплекс аиҭашьақәыргылара авиациатә еимадара ахацыркразы. Адокумент иаҵаҩын Аԥсны Аҳәынҭқарра Аекономика аминистрреи Урыстәылатәи Афедерациа Аекономикатә ҿиара аминистрреи еиҿыркааз аинвестор иалхразы аицлабра иаанарԥшыз аихшьалақәа рыла.

Аиқәшаҳаҭра аҳәаақәа ирҭагӡаны ахархәаразы  еиҭашьақәыргылахоит аеродром. Аинвестор 3100 м аура змоу, зыҭбаара 45 м. ыҟоу ашьҭԥраара-ртәаратә цәаҳәа аиҭашьақәыргылара мҩаԥигараны дыҟоуп, уи иалнаршоит ҳаамҭа иақәшәо Урыстәылеи аҳәаанырцәи иҭрыжьуа аҳаирпланқәа рыдкылара.  Ашьҭԥраара-тәарҭатә цәаҳәаҿы аҭатәаразы аинструменталтә ҭаларазы амыруга, иара убас ИКАО актәи акатегориа иаҵанакуа аԥыррақәа   алашарасигналтә реиқәыршәара алзыршо асистема.
  
Иара убас еиҭашьақәыргылахоит аԥсҟы мҩеи апассаџьыртә перрон ахәҭаки, иргылахоит аперрон азы аҭыԥ ҿыц, аҳаирпланқәа рыртәарҭа ҭыԥ арҭбааразы. Апроект аҟны иазгәаҭоуп амашәыр -еиқәырхаратә станциа ҿыц аргылара, аӡышьҭра-ӡҭарбаратә система, арыцқьаратә хыбрақәа, аҳаирпланқәа мҵааразы ирыдыруло аусқәа ахьымҩаԥырго уҳәа, жәларбжьаратәи астандартқәа ирықәшәо егьырҭ аобиектқәа.

Аеродром арҿыцра анаҩсангьы иргылахоит апассаџьыртә терминал ҿыц, иара убас аҳаиртә баӷәаза аҭоурыхтә хыбра еиҭарҿыцхоит. Атерминал ҿыц иаакәыршаны еиҿкаахоит апарк.  Аҭоурыхтә хыбраҿы иазгәаҭоуп аофицалтә хаҿқәеи аделегациақәеи рыдкыларҭа. Аҳаирвокзалтә  комплекс ҿыц  сааҭк иалагӡаны иаунажьыр алшоит 1300-ҩык апассаџьырцәа.

Атерминал ҿыц аргылара инаваргыланы, аҳаиртә баӷәазаҟны иргылахоит ма еиҭашьақәыргылахоит административтә-усеиҿкааратә хыбрақәа, иҷыдоу атранспорти арҽеиратә усурақәеи ирызку амаҵзурақәа рзы аргыламҭақәа, абылтәыҭаҭәарҭатә комплекс.

«Аԥсны Аҳәынҭқарразы аҳаиртә баӷәаза аусура аиҭахацыркра, ҳәарада, акрызҵазкуа хҭысуп. Ишдыру еиԥш, ари аԥхьа апроект анагӡаразы аԥҟарақәа ҳәаақәызҵо Аиҳабырабжьаратә еиқәшаҳаҭра азырхиара иазкыз аусура ду мҩаԥган.
Иахьа изҵаҩу аҳәынҭқарра-хазхаҭалатәи аусеицуразы Аиқәшаҳаҭра ишьақәнаргылоит аҿҳәара, аԥҟарақәа, акомплекс арҿыцреи аиҭашьақәыргылареи  ирзаужьхо афинансқәа рымҽхаки уинахыстәи ахархәара шымҩаԥысуеи ртәы.
Аҳәынҭқарра иахатәтәны инхоит аеродром, аеродромтә инфраструктура, аҳаиртә вокзал аҭоурыхтә хыбра, ҩ-ҵакык змоу аобиект астатуси ахьӡи "В.Г. Арӡынба ихьӡ зху Аҟәа ақ. Жәларбжьаратәи аҳаиртә баӷәаза". Ҳаԥхьаҟа иаҳзыԥшуп апроект анагӡаразы еицаҳзеиԥшу аусура. Агәра ҳгоит, аҳаиртә баӷәаза аусура ҳтәыла аҿиара иацхраауа ак акәны ишыҟало", - лҳәеит аԥыза-министр актәи ихаҭыԥуаҩ, аекономика аминистр Кристина Озган.

Рашид  Нургалиев, ЗҲӘА "Аинфраструктуратә ҿиара" зхатәу, Аԥсны анапхгара иҭабуп ҳәа реиҳәеит  ирыдигалаз аҳаиртә баӷәаза арҿыцразы апроект адгылара ахьарҭаз. "Аԥсны аԥсшьарҭақәа рахь атуристцәа иаадырԥшуа аинтерес есышықәса иазҳауеит. Аҳаиртә баӷәаза аартра иабзоураны аԥсшьаҩцәа ирласны, насгьы иманшәаланы Аԥсны акурортқәа рҭаара  алнаршоит", - иҳәеит иара, иагьазгәеиҭеит  ҳаамҭа иақәшәо аҳаиртә баӷәаза ареспублика иамоу атуристтә лшара анагӡара ишацхраауа.

" Ҳара нап аҳаркуеит зымҽхак ҭбаау апроект анагӡара, аԥхьа игылоу хықәкуп - аеродром аиҭашьақәыргылара. Аамҭа кьаҿк иалагӡаны аперрон ырҭбаахоит, ирҿыцхоит аԥсҟы мҩақәеи ашьҭԥраара-тәарҭатә цәаҳәеи, иара убас алашарардыргала еиқәыршәахоит. Уи хымԥада иаҭахуп Аԥсны Аҳәынҭқарра жәларбжьаратәи аимадара ахацыркразы", - иҳәеит ЗҲӘА "Аинфраструктуратә ҿиара" адиректор хада  Сергеи Грибков. Иара убас иазгәеиҭеит иуникалтәу аҳаирвокзалтә комплекс аргылара ишалаго, агәра шиго иҳәеит  Аԥсны Аҳәынҭқарра ауааԥсыреи аԥсшьаҩцәеи Аҟәа аҳаиртә баӷәаза  ишақәнагоу еиԥш ахә шыршьо.
Анапаҵаҩра иазкыз аусмҩаԥгатә иалахәын Ахада ихаҭыԥуаҩ Бадра Гәынба, Аԥыза - аминистр Александр Анқәаб, Аԥсны Жәлар Реизара Аиҳабы Лаша Ашәба, Ахада Иадминистрациа Анапхгаҩы Абесалом Кәарҷиа, Аԥыза –аминистр актәи ихаҭыԥуаҩ, аекономика аминистр Кристина Озган.







Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org