Аҧсны Аҳәынҭқарра Ахада

 

Аслан Бжьаниа Шәача Урыстәыла адәныҟатәи аусқәа рминистр Сергеи Лавров диҧылеит

03.10.2023

Аслан Бжьаниа Шәача Урыстәыла адәныҟатәи аусқәа рминистр Сергеи Лавров диҧылеит

Аҧсны Аҳәынҭқарра Ахада Аслан Бжьаниа Шәача Урыстәылатәи Афедерациа адәныҟатәи аусқәа рминистр Сергеи Лавров диҧылеит.

"Ҳаиҧылара сеигәырӷьоит. Зегь раҧхьа иргыланы, ишәыдысныҳәаларц сҭахуп аҵак ду змоу  арыцхә - Аҧсны Аҳәынҭқарра Ахьыҧшымра  жәларбжьаратәи азхаҵара 15 ш. ахыҵреи, Аиааиреи  Ахьыҧшымреи 30 ш. рхыҵреи. Издыруеит, мҽхакыҭбаала аусмҩаҧгатәқәа шымҩаҧысыз, Урыстәылатәи  Афедерациа ахаҭарнакцәагьы алархәны.

Ҩаҧхьа иазгәасҭарц сҭахуп Аҧсны Аҳәынҭқарра ашьақәгылараҿы, аекономика, асоциалтә усхк, афымцамч уҳәа, еиуеиҧшым ахырхарҭақәа русхк аҟны ҳусеицзура, жәларбжьаратәи аизыҟазаашьақәа рганахьала аусеицурагьы убрахь иналаҵаны. Аҧсны Аҳәынҭқарра ахьыҧшымра азхазҵара амҽхак  аҧхьаҟагьы иҳарҭбаалоит",- иҳәеит Сергеи Лавров, Аслан Бжьаниа аҧсшәа иаҳәо.

Урыстәыла адәныҟаполитикатә усбарҭа Ахада Аслан Бжьаниа иҭабуп ҳәа иеиҳәеит  Урыстәыла иҷыдоу арратә операциа иалахәу аибашьцәа еснагьтәи ириҭо ацхырааразы.

"Сгәы иаанагоит иҟашәҵо адгылара Урыстәылатәи Афедерациа Ахада иқәгыларақәа рыҟны иазгәеиҭо алҵшәақәа ралыршараҟны ицхыраагӡахоит ҳәа. Иахьа абарҭқәа зегьы ҳрылацәажәоит, урҭ рхыҧхьаӡараҿы аҧхьаҟатәи егьырҭ аиҧыларақәа рыҟны ишьҭыххо азҵаарақәагьы налаҵаны",- иҳәеит Лавров.

"Ҳаиҧылара агәахәара снаҭеит. Иазгәасҭарц сҭахуп, ҳаимадарақәа қәҿиарала аҿиара ишаҿу. Урыстәылатәи Афедерациа анапхгара иҭабуп  ҳәа раҳҳәоит  Аҟәа аҳаиртә баӷәаза аиҭашьақәыргыларазы.  

Ҳара ҳзы уи аҵак ду амоуп, акыршықәса раахыс ари аус азгәаҭаны иҳаман. Иҭабуп ҳәа шәасҳәоит ҩ- тәылауаҩрак рзы аиқәшаҳаҭразы.  Ари аҵак ду амоуп, ҳтәылауаагьы даара гәахәала ирыдыркылеит",- иҳәеит Аҧсны Ахада.

Аҳәынҭқарра Ахада иазгәеиҭеит Аҧсны анапхгареи ауаажәларреи аинтеграциатә процессқәа ишрыдгыло, Урыстәылатәи Афедерациа аҧшьгарала имҩаҧысуа. "Ҳара уи ҳхы алаҳархәырц ҳҭахуп, Аҧсны атәылауаа ринтересқәа шьаҭанкыла ирықәшәоит",- иазгәеиҭеит Аслан Бжьаниа.

Иара убас Аҧсны Ахада иҳәеит иҟоу аҭагылазаашьақәа ҳхы иархәаны Урыстәыла иҷыдоу арратә операциа адгылара шарҭо. "Асабрадақәа, ишырҳәо еиҧш, ирҿыхуп. Еилкаауп зҿы аус ҳамоу, убри аҟынтә агәра жәгарц шәылшоит аҵыхәтәанӡа ҳашшәыдгыло",- иҳәеит иара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org