Аҧсны Аҳәынҭқарра Ахада

Аԥсны Ахада 1992-1993 шш. Аҧсны Аџьынџьтәылатә еибашьра иалахәыз хатәгәаԥхаралатәи аибашьцәа дрыдныҳәалеит.

Адныҳәалараҟны иҳәоуп:

Акыр иаԥсоу ҳаибашьцәа, гәык-ԥсык ала ишәыдысныҳәалоит Хатәгәаԥхаралатәи аибашьҩы имш.

31 шықәса раԥхьа 1992-1993 шш. Аҧсны Аџьынџьтәылатә еибашьра иалагеит. Убасҟан, аибашьра ианналага аҩбатәи амш инаркны Аҟабарда жәлар рҵеи иаша Султан Асланбек-иԥа Сосналиев напхгара ззиуаз хатәгәаԥхаралатәи аибашьцәа ргәыԥ ааны ҳаибашьцәа ирывагылан.
Ақырҭуа агрессор иҿагыланы ахақәиҭразы иқәԥоз   хажәлар иарӷьажәҩаны ирыдгылан хатәгәаԥхаралатәи аибашьцәа Алада Урыстәыла, Аҩадатәи Кавказ ареспубликақәа рыҟнытә, мшыннырцәынтә ҳџьынџьуаа, Алада Уаԥстәыла Ареспубликеи Приднестровиатәи Молдавиатәи Ареспубликеи рыҟнытә.
Абас хамеигӡарада игылаз Аԥсны жәлари урҭ аиҩызара, аиашьара рзызуаз  аибашьцәеи ирыбзоураны иҳалшеит Аԥсны ахақәиҭреи ахьыԥшымреи реиқәырхара.

Аԥсны Аџьынџьтәылатә еибашьра иалахәын 2000-ҩык инареиҳаны хатәгәаԥхаралатәи аибашьцәа, урҭ рахьтә фырхаҵарала иҭахеит 460-ҩык инареиҳаны.  Аԥсны жәлар наунагӡа ирхашҭраны иҟаӡам ҳаԥсадгьыл Аԥсны ахақәиҭра зхы ақәызҵаз хатәгәаԥхаралатәи аибашьцәа иаадырԥшыз афырхаҵара.
Урҭ рыхьӡ кашәара ақәӡам.

Хьӡи-ԥшеи згым Аԥсны аҭоурых адаҟьақәа ирнылаз хатәгәаԥхаралатәи аибашьцәа ргәымшәареи рфырхаҵареи ҿыц игыло абиԥарақәа рзы иҟалеит аԥсадгьыл абзиабареи, ахамеигӡареи рзы иҿырԥшыганы. Иҭабуп ҳәа раҳҳәоит арҭ аҵеицәа хьӡырҳәагақәа зааӡаз аҭаацәа.

Акыр иаԥсоу хатәгәаԥхаралатәи аибашьцәа, Аԥсны жәлар ҳаҭырла иргәаладыршәоит ԥгара ақәӡамкәа иҳабжьоу аиашьареи аидгылареи. Абри амш аҽны ишәзеиӷьасшьоит шәаргьы шәҭаацәарақәагьы агәабзиара, анасыԥ, аҭынчра.