Аҧсны Аҳәынҭқарра Ахада

Аҧсны Аҳәынҭқарра Ахада зхадараҿы дыҟоу аҧснытәи аделегациа актәи Кавказтәи аинвестициатә цәыргақәҵа аартра иазку агәырӷьаратә усмҩаҧгатә иалахәын.
Ацәыргақәҵа мҩаҧысуеит Аминералтә ӡқәа рыҟны.

Ацәыргақәҵа иаҭааит Урыстәылатәи Афедерациа арегионқәа зегьы рҟынтә асасцәа, Нхыҵ-Кавказтәи афедералтә округ ахадацәа.

Ацәыргақәҵа алахәцәеи асасцәеи аҧсшәа реиҳәеит Урыстәылатәи Афедерациа Аиҳабыра Ахантәаҩы Ихаҭыҧуаҩ Алеқсандр Новак. Иара иазгәеиҭеит азҿлымҳара азҭо аганқәа злархәу аусмҩаҧгатә амҽхак аҭбаара, иҳәеит Кавказтәи аинвестициатә цәыргақәҵа Ставропольтәи атәылаҿацә ахь аинвестициа адыҧхьалара аимпульс ҿыц шанаҭо.
"Иахьа имҩаҧысуеит хыҧхьаӡара рацәала аиҿцәажәарақәа, апленартә сессиақәа, уа ирылацәажәараны иҟоуп зеиӷьыҟам арегион аҿиареи аинвестициа адыҧхьалареи ирызку азҵаарақәа. Ашәҟәы иҭагалоу алахәцәа рхыҧхьаӡара х-нызқьҩык инареиҳаны иҟоуп. Ара иҟоуп арегионқәа рхадацәа, абизнес ахаҭарнакцәа. Агәра згоит, иҿыцу аиқәшаҳаҭрақәа маҷымкәа ишрыҵаҩхо. Ақәҿиарақәеи, алҵшәа бзиа змоу аусуреи шәзеиӷьасшьоит. Ацәыргақәҵа аартра шәыдысныҳәалоит", - иҳәеит Алеқсандр Новак.

Нхыҵ-Кавказтәи Афедералтә округ аҟны иҟоу Урыстәылатәи Афедерациа азинмчы змоу ахаҭарнак  Иуури Чаикеи Ставропольтәи атәылаҿацә Агубернатор Владимир Владимирови иаҵшьны иазгәарҭеит арегион зегьы азы ацәыргақәҵа иамоу аҵакы.