Жәабранмза 27 рзы Аҧсны Аҳәынҭқарра Амассатә информациа ахархәагақәа рымш аҽны Аҧсны Ахада Аслан Бжьаниа азанааҭтә ныҳәа рыдиныҳәалеит АИХ аусзуҩцәа.
Аредациақәа рколлективқәа, аблогерцәа, ихьыҧшым авторцәа рыхьӡала Ахада иҟаиҵаз адныҳәаларатә цҳамҭаҿы иазгәеиҭеит АИХ русура аҵакы.
«Ажурналисттә усура инанагӡо ароль дуӡӡоуп адемократиатә уаажәларра ашьақәгылараҟны. Шәара шәусура уадаҩуп, аҭакԥхықәрагьы ацуп, аҵакгьы дууп. Шәара ауаажәларра аинформациа роуртә иҟашәҵоит, ргәаанагара ашьақәыргылара шәацхраауеит, аполитикатәи ауаажәларратәи процессқәа анырра рышәҭоит.
Шәара ишәыбзоураны ҳажәлар ҳтәылаҟнеиԥш, адунеиаҿы иҟоу ахҭысқәа ртәы раҳауеит. Аҳәынҭқарратә мчхара аусбарҭақәеи АИХ-и лыҵшәа аманы русура аинформациатә политика шьаҭас иамоуп, избан акәзар шәаргьы ҳаргьы уснагӡатәны ҳҿаԥхьа иқәгылоуп ҳауаажәлар реидкылара, доуҳала реизҳара алыршара, апатриотизм рылаӡаара, иахьатәи аамҭа иақәшәо аинформациатә наӡаӡааӡара аԥҵара. Шәара шәусура ауаажәларреи аҳәынҭқарреи рзы хра змоу акы акәны иҟоуп есқьынгьы», - аҳәоит адныҳәалара атекст аҿы.
«Аҧсны Аҳәынҭқарра аныҳәатәи агәаларшәагатә мшқәеи» рзы азакәан инақәыршәаны, жәабранмза 27 Амассатә информациа ахархәагақәа русзуҩцәа рзы ныҳәамшуп.
Абри амш аҽны, 1919 ш.рзы иҭыҵит аҧсуа литература ашьаҭаркҩы Дырмит Гәлиа редакторс дызмаз раҧхьатәи аҧсуа газеҭ «Аҧсны».