Аҧсны Аҳәынҭқарра Ахада

 

Имҩаԥсыит Аԥсны Аҳәынҭқарра Ахада Аслан Бжьаниеи Белорусь Ареспублика Ахада Алеқсандр Лукашенкои реиԥылара

21.02.2023

Имҩаԥсыит Аԥсны Аҳәынҭқарра Ахада Аслан Бжьаниеи Белорусь Ареспублика Ахада Алеқсандр Лукашенкои реиԥылара

Аслан Бжьаниа усуратә визитла Белорусь даҭааит жәабранмза 20, ашәахьа. Аиԥылара мҩаԥысит Минск, Ахьыԥшымра Ахан аҟны. Иара убас, аиԥылара далахәын  Аԥсны адәныҟатәи аусқәа рминистр Инал Арӡынба.

Аиҿцәажәарақәа рыҟны ирзааҭгылан ҩ-ганктәи аусуеицура, аекономикатәи ааглыхратәи еимадарақәа ирыдҳәалоу азҵаатәқәа рырҿиара. Уи аԥхьа, иусуратә ныҟәарақәа ирылагӡаны Аслан Бжьаниа даҭааит Минсктәи атрактортә зауад, Ахолдинг "Горизонт", атехнологиа ҳаракқәа рпарк.

Аслан Бжьаниа иазгәеиҭеит, Беларусь Ареспублика дшаҭааз 2022 ш.цәыббрамза 28 рзы Алеқсандр Лукашенко Аԥсны даныҟаз иҟаиҵаз ааԥхьарала.

Аԥсны Аҳәынҭқарра Ахада аиҿцәажәара алҵшәақәа рзы игәаанагара иҳәеит ажурналистцәа данрацәажәоз.  "Шәара ижәдыруеит, Аԥсны ԥсшьарҭа тәыланы ишыҟоу, аҳауа шызҩыдоу, Белоруссиантәи еснагь асасцәа ҳреигәырӷьоит. Сара снапы зҵазҩыз Аусԥҟа инақәыршәаны Белоруссиа атәылауаа Аԥсны визада рыҟазаара аҿҳәара иацҵахоит. Иаԥҵоуп Ахәаахәҭратә ҩны, уи аусура аҳәаақәа ирҭагӡаны аҭагылазаашьа ыҟоуп Аԥсны аалыҵ Белоруссиаҟа аашьҭразы. Иара убас, ҳаиқәшаҳатхеит Аԥснынтә аҿар рԥышәа аизырҳаразы Белоруссиа атехнологиа ҳаракқәа рпарк аҭааразы. Аԥсны ақыҭанхамҩа аалыҵ анаҩсгьы, ааглыхратә аалыҵ аанахәо иҟалоит, ҷыдала, белоруссиатәи ааглыхраҟны аԥхьагылара змоу – азауад "Горизонт" аалыҵ , - иҳәеит  Аслан Бжьаниа.

Ахада иазгәеиҭеит, Белоруссиа Ареспубликеи ҳареи аимадарақәа рышьақәыргылара   аҵак ду шамоу. "Ҳара мраҭашәаратәи аҳәынҭқаррақәа ирыбзоураны амацәаз ҳҭакын, Урыстәыла амчала, иҟоу амҩақәа раатра апроцесс хацыркхеит.  Ҳарҭ иаҳҭахуп ҳаизыҟазаашьақәа агәылеимабзиаратә ҟазшьа рымазарц, ааглыхратә еимадара хшыҩзышьҭра аҭаны".


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org