Аҧсны Аҳәынҭқарра Ахада

 

Ахада афымцамчи аинвестициатә усуреи ирызку иактуалтәу азҵаарақәа инарымаданы аилацәажәара мҩаԥигеит

22.11.2022

Ахада афымцамчи аинвестициатә усуреи ирызку иактуалтәу азҵаарақәа инарымаданы аилацәажәара мҩаԥигеит

Аҧсны Аҳәынҭқарра Ахада Аслан Бжьаниа аусуратә еилацәажәара мҩаҧигеит Аҧсны Аҳәынҭқарра аҩныҵҟа афымцамчи аинвестициатә усеицуреи ирызку хра злоу азҵаарақәа ирызкны.

Аҧыза-министр ихаҭыԥуаҩ, аекономика аминистр Кристина Озган адырра ҟалҵеит Ахада идҵала иҳаҩсыз амчыбжьазы Урыстәылатәи Афедерациа Афымцамч аминистрраҟны имҩаҧысыз аиҿцәажәарақәа рылҵшәазы. Уи далацәажәеит   "Аҽгәара" ацәаҳәаҟны аужьра-еиқәыршәаратә усурақәа рымҩаԥгаразы афымцамч аагареи, иара убас Егры Афымцатә станциаҟны аӡы аҩаӡара алаҟәреи ртәы.

Озган иҟалҵаз адыррала, заанаҵтәи аиқәшаҳаҭра алыршоуп, иахьа иахымгакәа аамҭеихшареи аҿҳәарақәеи ртәы еибырҳәараны иҟоуп, анаҩс аспециалистцәа "Аҽгәара" аусурақәа рымҩаҧгаразы ицоит. Аминистр лажәақәа рыла, аусурақәа рымҩаԥгара аҿҳәара аинформациа ҟалоит аусурақәа рымҽхак ашьақәыргылара анаҩс.

Ахада адҵа ҟаиҵеит есҽны имҩаҧысуа аусурақәеи алҵшәақәеи ирызкны адырра ирҭаларц.

Ахада иаҵшьны иҳәеит ахатәтәра азин ала аԥсуа ган апринципреи хьаҳәа-ԥаҳәада агәаанагареи амазароуп: ашьҭԥраара-ртәаратә цәаҳәеи аҳаирбаӷәазатә инфраструктуреи хымԥада Аԥсны Аҳәынҭқарра иатәны инхароуп.

Аилацәажәара ахәҭа ду аинвестициатә проектқәа ирзыкын. Ахада Аԥыза-министр  Александр Анқәаб инапы ианиҵеит аинвестпроектқәа рынагӡара инамаданы аҭагылазаашьа ҷыдала хылаԥшра аҭара.  «Ҳнапаҿы амҩатә хсаала ҳамазароуп: аусурақәа ралагамҭа, урҭ рынагӡаразы аамҭеихшара, иҟалар зуа ауадаҩрақәа реиқәыԥхьаӡа зныԥшуа адокументқәа. Уи адагьы, Ахада Иадминистрациаҟны мызкы ахьтә знык имҩаԥыслоит «аинвестициа асааҭ», иҟоу аҭагылазаашьақәа рыхцәажәара, анализ азура ахьымҩаԥысло. Лыҵшәа бзиала аусеицуразы арҭ аусмҩаԥгатәқәа мҩаԥыслоит аинвесторцәа рхаҭарнакцәа алархәны», - иҳәеит аҳәынҭқарра Ахада.  
    
«Еилкааны иҳамазроуп ахыдҵақәа аҩ-ганкгьы инхарҭәааны ишынарыгӡаракәу. Ҳара адокументқәа ирыҵаҳаҩуеит, нас жәашықәсала аинвесторцәагьы ҳбом, алҵшәақәагьы, аҭыԥқәа аҳәыра рхиаалоит. Ас ҟалашьа амаӡам, избан акәзар аинвесторцәа рыҟнытә аҳәынҭқарра иаиуа ахашәалахәқәа – асоциалтә проектқәа рынагӡара иазкхоит», -  аихшьала ҟаиҵеит Ахада.

Аилацәажәара иалахәын Аԥыза-министр Александр Анқәаб, Аԥсны Жәлар Реизара – Апарламент Аиҳабы Лаша Ашәба, Ахада Иадминистрациа Анапхгаҩы Џьансыхә Нанба, Аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа, Аԥыза-министр ихаҭыԥуаҩ, аекномика аминистр Кристина Озган, Аҳәынҭқарратә мазара напхгараҭареи априватизациеи рзы аҳәынҭқарратә усбарҭа ахантәаҩы Беслан Кәыбраа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org