Аҧсны Аҳәынҭқарра Ахада

 

Ахада хаҭала игәеиҭеит Бедиа ақыҭаҟны иаҳараку авольттә цәаҳәа "Аҽгәара -220"аҟны иҟалаз аиҧҟьара ахҟьа-ԥҟьақәа раԥыхра инамаданы иҟаиҵаз анапынҵақәа рынагӡашьа

04.11.2022

Ахада хаҭала игәеиҭеит Бедиа ақыҭаҟны иаҳараку авольттә цәаҳәа "Аҽгәара -220"аҟны иҟалаз аиҧҟьара ахҟьа-ԥҟьақәа раԥыхра инамаданы иҟаиҵаз анапынҵақәа рынагӡашьа

Аҧсны  Аҳәынҭқарра Ахада Аслан  Бжьаниа ахәаша, абҵарамза 4 рзы хаҭала игәеиҭеит Бедиа ақыҭаҟны иаҳараку авольттә цәаҳәа "Аҽгәара -220"аҟны иҟалаз аиҧҟьара ахҟьа-ԥҟьақәа раԥыхра инамаданы иҟаиҵаз анапынҵақәа рынагӡашьа.
Арҽеиратә усурақәа ахьымҩаԥысуаз аҭыҧ аҿы иҟан аҧыза-министр ихаҭыԥуаҩ, аекономика аминистр Кристина Озган, Ареспубликатә унитартә наплакы "Амшынеиқәафымцамч" Адиректор хада инапынҵақәа назыгӡо Зураб Багаҧшь.

Аҳәынҭқарра Ахада иазгәеиҭеит аҵыхәтәантәи амшқәа рзы атәылауаа ирлас-ырласны фымцалашарада ишаанхо, уи ишахҟьо ицәырҵуа азҵаарақәагьы. "Убри аҟынтә абыржәы исашәҳәарц сҭахуп ас еиԥш аҭагылазаашьа зыҟалаз, уи арҽеиразы иарбан уснагӡатәқәоу имҩаԥыжәго. Ҳазҭагылоу аамҭазы 90% ацәаҳәа аидара амоуп",-иаҵшьны иҳәеит Аслан Бжьаниа.
Кристина Озган аҳәынҭқарра Ахада адырра илҭеит Ахада идҵа инақәыршәаны аус шадулоу Урыстәылатәи Афедерациа аҟынтә афымцамчы аагара алшара.
Лара иазгәалҭеит иҳараку авольттә цәаҳәа "Аҽгәара" шьаҭанкылатәи арҽеиратә усура амҩаԥгаразы аханатә ҿҳәарас ишарбаз жьҭаарамза 1 инаркны абҵарамза 15-нӡа, аха аҧсуа ган иадҳәалам, атехникатә мзызқәа ирхырҟьаны афымцамч аагаразы аҧкра алагалоуп абҵарамза 1 аҟынӡа, уи азҵаара, хымҧада, ԥыҭрак ашьҭахь иазыхынҳәраны ишыҟоу.
Аҧыза-аминистр  ихаҭыԥуаҩ илҳәеит 32 км рахьтә мызкы аҩныҵҟала 24 км шыҧсаху. Иаанхеит даҽа аа-километрак. Ари ихадароу, раҧхьатәи мзызуп.  "Аҩбатәи амзыз адҳәалоуп аамҭа азымхара, инҭырҳәыцааны имҩаԥгоу аусурақәеи ахархәарахь ирыҭоу ацәаҳәаҿы имҩаҧгаз аусурақәеи рзы атест амҩаԥгаразы. Аус зыдулаз ацәаҳәа зда ҧсыхәа ыҟам арежим ала аусура иалагалан. Убри иахҟьаны афымцамчы аужьра иадҳәалаз ауадаҩрақәа цәырҵит, избанзар ацәаҳәақәа ахархәарахь ианрыҭаз ицәырҵыз апроблемақәа аҧыхтәын",- лҳәеит аекономика аминистр.    

Лара иара убас иазгәалҭеит "Амшынеиқәафымцамч" анаплакаҿы ишаҧҵоу атехникатә штаб, абри аамҭа зегьы аус зуаз. "Иацы ахәылбыҽха аусурақәа рылҵшәақәа ирыдҳәаланы аизара мҩаҧысит, иахьа шьыжьнаҵы убри аҩыза аизара мҩаҧган арҽеиратә усурақәа ахьцоз", - лҳәеит лара.   ́

Аслан Бжьаниа Зураб Багаҧшь диазҵааит аамҭа шаҟа аҭаху аужьра-ҭышәныртәаларатә усқәа ҳәа. "Амшынеиқәафымцамч"  Адиректор хада инапынҵақәа назыгӡо иҳәеит, "Амшынеиқәафымцамч" иара ахатә амчала иҟанаҵозтгьы зегьы, хымз иреиҳаны ишадхалоз. "Убри аҟынтә Урыстәылантәи абригадақәа ааҧхьан, аусурақәа еиҳа лассы ихыркәшахарц азы. "Мызки бжаки иалагӡаны аҿҳәара азыҧҵәан, уи ҳаҽҭаҳагӡон. Афымцамч аагара алыршан, ҳара аус ҳуан, аха рыцҳарас иҟалаз, аҵыхәтәантәи ҩымчыбжьа аусурақәа зегьы рхыркәшара ҳалымшаӡеит. Уи аамҭа аужьра-ҭышәныртәаларатә усурақәа рхыркәшара иазкхеит. Абасала, ацәаҳәа ахәҭак акәын иҟаҵаз",-иҳәеит "Амшынеиқәафымцамч" Адиректор хада инапынҵақәа назыгӡо.
Иара убас уи иҳәеит, афымцалашара аагара анаанкылаха, ацәаҳәа ҿыц ахархәара аҭатәхеит, иаиуз аидара азоужьра-ҭышәныртәаларатә усурақәа раан раҧыхра зылшоз ауадаҩрақәа цәырнагеит. Абасала, ацәаҳәа ҿыц аусураҟны ҷыдарақәак ааԥшит, уи иаанаго уи ауп, атәылауаа афымцамчы еиҧымкрада ироулартә изалыршахаӡом.

Аҳәынҭқарра Ахада аҧыза-министр ихаҭыԥуаҩ, аекономика аминистр Кристина  Озган илыдиҵеит Урыстәылатәи Афедерациа Афымцамчы аминистрра дрыҿцәажәарц атәылауаа фымцамчыла реиқәыршәаразы афымцамч аагаразы, насгьы имҩаҧгоу аусурақәа рзы есҽны адырра ирҭаларц.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org