Аҧсны Аҳәынҭқарра Ахада

 

Аҧсны Аҳәынҭқарра Ахада Аслан Бжьаниа Аҧсны Аҭҵаарадыррақәа ракадемиа 25 шықәса ахыҵра инамаданы аныҳәатә еилатәараҟны иқәгылара

04.11.2022

Аҧсны  Аҳәынҭқарра Ахада Аслан  Бжьаниа Аҧсны Аҭҵаарадыррақәа ракадемиа 25 шықәса ахыҵра инамаданы аныҳәатә еилатәараҟны иқәгылара

Аҧсны  Аҳәынҭқарра Ахада Аслан  Бжьаниа Аҧсны Аҭҵаарадыррақәа ракадемиа 25 шықәса ахыҵра инамаданы аныҳәатә еилатәараҟны дықәгылеит.

Ҳаҭыр зқәу Аҧсны Аҭҵаарадыррақәа   ракадемиа, аҭҵаарадырратә уаажәлаара алахәцәа!

Ишәыдысныҳәалоит аҵак ду змоу Аҧсны Аҭҵаарадыррақәа ракадемиа 25 шықәса ахыҵра арыцхә!  

25 шықәса раҧхьа  Аҧсны  Аҳәынҭқарра Актәи Ахада Владислав  Григори-иҧа Арӡынба инапы аҵаиҩит "Аҧсны  Аҭҵаарадыррақәа ракадемиа аҧҵаразы" Аҧсны  Аҳәынҭқарра  Иреиҳаӡоу  Асовет Ақәҵара анагӡара иазку ауснагӡатәқәа рзы" Аусҧҟа. Ари ареспубликазы акыр иуадаҩыз аамҭазы имҩаҧысуан, аха ареспубликеи уи аҧхьаҟатәи аҧеиҧши рзы Академиа аҧҵаразы ирыдыркылаз азызба аҵак дуӡӡа аман. Аҳәынҭқарра нхарҭәааны иҿиаразы, хымҧада, аҭҵаарадырра иамоу аҵакы дууп, уи амилаҭтә економика, ааглыхра, ақыҭанхамҩа, акультура, аҵараиура рыҿиара алзыршо акоуп.
Имариамызт Аҧсны Аҭҵаарадыррақәа ракадемиа знысыз амҩа. Ҳҵарауаа реихьӡарақәа еицырдыруеит ҳтәылаҟнеиҧш, уи  анҭыҵгьы. Шәара шәусуреи шәыҭҵаарадырратә усумҭақәеи ирыбзоураны адунеи аҿы ҳтәыла ибеиоу аҭоурых- культуратә ҭынха атәы рдыруеит, ҳмилаҭ-хақәиҭратә қәҧара, ахьыҧшымразы ақәҧара иазку аиаша рдыруеит.
  
Акырӡа аҵанакуеит аҭҵаарадырратә еилазаара азҿлымҳара ду ахьанаҭо жәларбжьаратәи аимадарақәа рымҽхак арҭбаара. Убри инамаданы, аҵак ду амоуп урыстәылатәи аҭҵаарадырратә школқәеи иара ирыбжьоу аҭҵаарадырра-техникатә усеицура арӷәӷәара.
Иахьа Аҧсны Аҭҵаарадыррақәа ракадемиа еиқәшәо аҭҵаарадырратә усбарҭақәа рыла ишьақәгылоуп, урҭ рыҭҵааратә лшарақәа есааира еизырҳалатәуп. Академиа аусура ахырхарҭа хадақәа ируакуп аҵарауаа ҿарацәеи аспирантцәеи аус рыдулара. Аҧсны Аҭҵаарадыррақәа ракадемиаҟны иаҧҵоуп еизҳауа абиҧара ҿа аспирантураҟны аҵара рҵартә, ҭҵаарадырратә хырхарҭа рацәала акандидаттәи адоктортәи диссертациақәа рыхьчартә еиҧш аҭагылазаашьа.
Гәахәараны иазгәаҭатәуп Аҧсны аҭҵаарадырратә интеллигенциа аҵарауаа ҿарацәа рҧышәа ахьрымардо.
Агәра згоит, аҭҵаарадырра ҿыц иаҵагыло  атрадициа беиақәа шеиқәдырхо, аихьӡарақәа шеихарҳауа.

Акыр иаԥсоу аҩызцәа! Даҽазныкгьы ишәыдысныҳәалоит Аҧсны Аҭҵаарадыррақәа ракадемиа 25 шықәса ахыҵра. Ишәзеиӷьасшьоит ҳ-Аҧсадгьыл аизҳазыӷьаразы аҭҵаарадырратә еихьӡарақәа, ақәҿиарақәа шәызлаго аусқәа зегьы рҟны.

Аслан Бжьаниа,
Аҧсны Аҳәынҭқарра Ахада
  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org