Аҧсны Аҳәынҭқарра Ахада

 

Аслан Бжьаниа Калмыкиа ахада Бату Хасиков дидикылеит

03.10.2022

Аслан Бжьаниа Калмыкиа ахада Бату Хасиков дидикылеит

Аԥсны Аҳәынҭқарра Ахада Аслан Бжьаниа Калмыкиа ахада Бату Хасиков дидикылеит.

«Ҳаҭыр зқәу Баҭу Сергеи-иԥа, бзиала уаабеит! Ҳадгьыл аҟны шәбара ҳаигәырӷьоит»,- иҳәеит Аслан Бжьаниа, асас аԥсшәа иаҳәо. Аиԥылараҟны ирылацәажәеит еиуеиԥшым аусхкқәа рыҟны аусеицура азҵаара.

Аҳәынҭқарра Ахада иазгәеиҭеит Аԥсни Урыстәылатәи Афедерациеи ганрацәалатәи аимадарақәа шрыбжьоу. «Урыстәылатәи Афедерациа асубиектқәеи ҳареи аимадарақәа, аекономикатә, аиҩызаратә, акультуратә еизыҟазаашьақәа ҳабжьаҳҵар ҳҭахуп»,- иҳәеит А. Бжьаниа.

Калмыкиа ахада иганахьала Аԥсны Ахада Аслан Бжьаниа иҭабуп ҳәа еиҳәеит аиԥыларазы. «Ҳаҭыр зқәу Аслан Гьаргь-иԥа, гәахәара дууп сара сзы Аԥсны Аҳәынҭқарраҟны сыҟазаара. Сара Аԥсны аҭоурыхи акультуреи рдырра сахьӡахьеит. Абас еиԥш ахшыҩҵак сызцәырҵит избаз анаҩс, «Аԥсны Аҳәынҭқарра аиааира символра азызуа аҭоурых аиқәырхара алшеит, ари иахьа ҷыдала аҵакы амоуп»,- иҳәеит Б. Хасиков.

Калмыкиа ахада иазгәеиҭеит Аԥсныҟа иаара хықәкыс ишамоу атуризм, аҵараиура, ақыҭанхамҩа ахырхарҭала аусеицура ахацыркра.
  «Сара зҿлымҳара аҭаны сахәаԥшуеит Урыстәыла еиуеиԥшым арегионқәеи ҳфедералтә центри шәареи шәшеиҿцаауа. Шәыгәҭакқәа шырацәоу збоит туризм, алогистика, ақыҭанхамҩа, аҵараиура инамаданы», - иҳәеит Б. Хасиков, Аԥсныҟа ажәалагалақәак иманы дшаазгьы азгәаҭаны.

Аҳәынҭқарра Ахада аҭакс иҳәеит ас еиԥш иҟоу аԥшьгарақәа, аимадарақәа рышьақәыргылара адгылара шриҭо.

Аслан Бжьаниеи Бату Хасикови иара убас иалацәажәеит жәларбжьаратәи амшхәаԥштә аҟны иқәгылоу азҵаарақәагьы.

Аиԥылара аихшьалақәа рыла А. Бжьаниеи Б. Хасикови агәаларшәагатә ҳамҭақәа еимырдеит.
  
Аиԥылара иалахәын Ахада Ихаҭыԥуаҩ Бадра Гәынба, Ахада Иадминистрациа Анапхгаҩы Џьансыхә Нанба, Аԥсны иҟоу Урыстәыла Ацҳаражәҳәарҭа абжьгаҩ-ацҳаражәҳәаҩ Максим Литвинов.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org