Аҧсны Аҳәынҭқарра Ахада

 

Ахада Ҭырқәтәыла иҟоу Аҧсуа культуратә центрқәа рфедерациа ахаҭарнакцәа дырҧылеит

27.09.2022

Ахада Ҭырқәтәыла иҟоу Аҧсуа культуратә центрқәа рфедерациа ахаҭарнакцәа дырҧылеит

Аҧсны Ахада Аслан Бжьаниа Ҭырқәтәыла иҟоу Аҧсуа культуратә центрқәа рфедерациа ахаҭарнакцәа дырҧылеит - Аҧсуа культуратә центрқәа  рфедерациа ахантәаҩы Мураҭ Махариа, Ҭырқәтәыла иҟоу аҧсуа диаспора абыргцәа рхеилак ахада Иумиҭ Аҭеиба, уи  ихаҭыҧуаҩ Биуленҭ Аҩӡба.

Аиҧылара иалахәын Ахада Иадминистрациа  Анапхгаҩы Џьансыхә Нанба, Ҭырқәтәыла иҟоу Аҧсны Аҳәынҭқарра азинмчы змоу ахаҭарнак Ибрагим Аҩӡба, уи ицхырааҩ Џьансыхә Лазба, Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа.

Асасцәа аҧсшәа раҳәо, Аслан Бжьаниа иазгәеиҭеит: "Ҳаиҧылара акырӡа сеигәырӷьеит. Иахьа, ныҳәа дууп - Аҟәа ақалақь ахақәиҭтәра иамшуп. Ҳара ҳзы гәахәароуп Ҭырқәтәыла инхо ҳашьцәа  рыҧсадгьыл ахь ирымоу аимадара есааира иахьдырӷәӷәо".

Ахада асасцәа ажәа риҭеит аҧсуа диаспореи аҭоурыхтә ҧсадгьыли реимадара арӷәӷәаразы иҟаҵатәу аусқәа ирылацәажәарц. Аҳәынҭқарра Ахада иҳәеит Ҭырқәтәыла инхо ҳџьынџьуаа ргәы иҵхо азҵаарақәа рҭак аҟаҵара дшазыхиоу. Ҭырқәтәыла еиҿкаау аҧсуа диаспора абыргцәа рхеилак ахада Иумиҭ Аҭеиба Ҭырҭәтәыла инхо аҧсуаа рыхьӡала Ахада Аҟәа ақалақь ахақәиҭтәра амши хара имгакәа иазгәаҳҭараны иҟоу Аиааиреи Ахьыҧшымреи рымш идиныҳәалеит.

"Ҳара даара ҳаигәырӷьеит ҳаиҧылара. Ҭырқәтәыла инхо аҧсуаа аҳәара ҟарҵеит рыхьӡала асалам шәыҭаразы, аныҳәа шәыдныҳәаларазы. Ҳара иҳамоуп ҳазлацәажәарц иаҳҭаху азҵаарақәа, ҳагьақәгәыӷуеит ҳаицәажәара аконструктивтә ҟазшьа аиуп ҳәа", - азгәеиҭеит Аҭеиба.

Аиҧылараҟны ирзааҭгылеит Ҭырқәтәыла инхо аҧсуаа атәылауаҩшәҟәқәа рыла реиқәыршәара азҵаара, Аҟәатәи аҳаиртә баӷәаза аартра, Аҧсны аҭаара иадҳәалоу ауадаҩрақәа, аҳаирплан абилеҭ ахә ацлара уҳәа реиҧш иҟоу азҵаарақәа жәпакы.

Аҧсуа диаспора аделегациа алацәажәеит Ҭырқәтәыла изықәшәо ауадаҩрақәа  ртәы. "Аҵыхәтәантәи аамҭазы  ҳџьынџьуаа акыр ауадаҩрақәа рҧылоит аҳаиртә мҩа ахәҧсазы. Иаалырҟьаны абилеҭқәа рыхә халеит. Аҧсуа тәылауаҩшәҟәы змоу визада даарц илшоит. Аҧсуа тәылауаҩшәҟәы змам, авиза иоуроуп, уи ауадаҩрақәа цәырнагоит. Шаҟа шықәса ҵуазеи Аҧсни Ҭырқәтәылеи рыбжьара апассаџьырцәа рзы  амшынтә мҩа аартра иалацәажәоижьҭеи, аха рыцҳарас иҟалаз, аҵак ду змоу азҵаара аӡбара залыршамхеит",- иҳәеит Ҭырқәтәыла иҟоу Аҧсны ахаҭарнак Ибрагим  Аҩӡба.
    
Иара убас иалацәажәеит аҳәынҭқарратә дача "Пицунда" азҵаара. Ахада хәҭа-хәҭала иҟоу аҭагылазаашьа атәы иҳәеит, ҷыдалагьы иаҵшьны иазгәеиҭеит адгьыл аҭира азҵаара шықәгылам. "Аиқәшаҳаҭраҟны ихадараны иҟоу ари адгьылҵакыраҟны иқәгылоу ахыбрақәеи аргыларақәеи роуп", - иҳәеит Ахада. Адиаспора ахаҭарнакцәа рганахьала аҳәынҭқарра Ахада Аслан Бжьаниа имҩаҧиго аполитикатә хырхарҭа ишадгыло атәы рҳәеит, УА аҳәынҭдача амазаратә комплекс  Пицунда ахатәтәразы аҭара иазку  Аҧсны  Аҳәынҭқарра  Аиҳабыреи  Урыстәылатәи Афедерациа Аиҳабыреи рыбжьара  Аиқәшаҳаҭра ашьақәырӷәӷәара азҵаарагьы налаҵаны.  Аҧсуафед уамашәа ирбеит ари азҵаара инамыцхәны аполитика ахьалху, ҧасатәи  Ахада Сергеи Багаҧшь ихаангьы  Ҭырқәтәыла иҟоу ҳџьынџьуаа "Аҧсны рҭиирц рҭахуп" ҳәа агәра ддыргарц ишаҿызгьы ргәаларшәаны иалацәажәеит.

Асасцәа аҳәынҭқарра  Ахада иҭабуп ҳәа иарҳәеит ҳаҭыр рықәҵаны иахьидикылаз азы, иара убас Ҭырқәтәылаҟа ааԥхьара иҭаны, ирҳәеит ддырҭаауеит ҳәа агәыӷра шрымоугьы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org