Аҧсны Аҳәынҭқарра Ахада

 

Ахада Тамшьтәи абжьаратәи ашкол автобус ҳамҭас иаиҭеит

20.08.2022

Ахада Тамшьтәи абжьаратәи ашкол автобус ҳамҭас иаиҭеит

Аҧсны Ахада Аслан Бжьаниа асабша ашьыжь, Очамчыра араион Тамшь ақыҭан ишкол гәакьа даҭааит. Ашкол аҭаара хықәкыс иаман автобус ҳамҭас аҭара. Аҳәынҭқарра Ахада ара аҵара иҵон, ара  дагьалгеит. Ари ашкол аҟны аус руан иара иҭаацәа.

Ахада иазгәеиҭеит автобус аахәаны, ҳамҭас ишриҭаз Аҧсны ииз амеценат Роберт Татулиан.
"Аҧхьаҟа иҵегьы шәҭагылазаашьа еиӷьхоит, ахәыҷқәа абассеин ахь иалажәгалоит, иара убас акультуратә усмҩаҧгатәқәа рахь. Иахьатәи аамҭазы зегь реиҳа иҧшӡоу атранспорт шәара ишәымоуп", - иҳәеит иара.

Д. Гәлиа ихьӡ зху Тамшьтәи абжьаратә школ адиректор Емма Зақараиа аҳәынҭқарра Ахада иҭабуп ҳәа иалҳәеит аҳамҭазы.
"Аслан Гьаргь-иҧа ибзиаӡаны аҵара иҵон, згәы аарту, зыламыс цқьоу уаҩуп. Иара иаб ашкол адиректорс дшыҟазгьы, иан рҵаҩыс, иҷыдаз зинк имамызт. Ҳара даара ҳгәы иахәоит иара иахьа абри аҩыза амаҵзураҿы дахьыҟоу, иҭабуп ҳәа шәасҳәоит ауаа ирзыҟашәҵо абзиарақәа рзы", - лҳәеит Тамшьтәи абжьаратә школ адиректор.

Анаҩс, Аслан Бжьаниа Ахада Иадминистрациа Анахгаҩы Џьансыхә Нанбеи Очамчыра Администрациа ахада Беслан Бигәааи ицны дырҭааит ҳазҭоу ашықәс мшаҧымза инаркны ари ашкол аҟны аус зуа Росатом ҷыдалатәи аклассқәа. Ара иаԥҵоу ҳаамҭа иақәшәо аклассқәа атомтә мчхаразы урыстәылатәи аҳәынҭкорпорациа ахарџьала еиҿкауап. Аклассқәа еиқәыршәоуп афизикеи, аматематикеи, аинформатикеи рзы алабораториатәи  атеориатәи ҽазыҟаҵарақәа рзы зыда ԥсыхәа ыҟам мыругала.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org