Аслан Бжьаниеи Андреи Назарови Уфатәи амотореибыҭарҭатә наплакы иаҭааит

Аслан Бжьаниеи Андреи Назарови Уфатәи амотореибыҭарҭатә наплакы иаҭааит

Аҧсны Аҳәынҭқарра Ахада Аслан  Бжьаниеи Башкорҭосҭан Аҧыза-министр Андреи Назарови Уфатәи амотореибыҭарҭатә ааглыхратә наплакы иаҭааит.

Аҧсны Ахада напхгара зиҭо аҧсуа делегациа игәарҭеит аҳаирплан рныҟәагатә хәҭақәа рҭрыжьразы ааглыхра-технологиатә центр аус шауа. Ари анаплакы аҟны иҟоу иахьатәи аамҭа иақәшәо ааглыхрақәа ируакуп.  300 чарҭеи аусадуларатә центрқәеи змоу ари  ацентр аҟны аус руеит  800-ҩык рҟынӡа амотореибаҭаҩцәа.

"УААН -  зҭоурых беиоу, аҵак ду змоу, иуникалтәу наплакуп, амашьынаеибыҭаратә усхк аҟны аҧышәа ду амоуп, - иҳәеит Андреи Назаров.Уи иҳәеит ара, зус еиқәшәаны аус зуа аколлектив аҩныҵҟа ишыҟоу уфатәи иреиҳау аҵараиурҭақәа ирылгахьоу аҿар рацәаҩны. Иара убас, алелегациа аҭааит авиациа ахыркәшаратә еидкыларҭеи адгьылхыхьтәи арныҟәагақәеи рцентр.

Анаҩс, аделегациа алахәцәа аҭааит ааглыхраҟны атехнологиатә усура хзыркәшо, аҭакԥхықәра ду змоу аамҭа хҵәаханы иҟоу, авиациатә рныҟәагақәа аԥышәара иахьахысуа ацех. Аԥышәараан аҭыжьымҭа аҳәаақәҵареи еиуеиԥшым арежимқәа раан аусушьа агәаҭареи мҩаԥысуеит.

Аслан Бжьаниа ахә ҳаракны ишьеит уфатәи амтореибаҭаҩцәа русумҭақәа. «Даара зҿлымҳара зыҭатәу зауадуп Уфатәи амотореибыҭаратә наплакы, улала иубо авиациатә рныҟәагақәа рҭыжьра џьашьахәуп. Ааглыхратә цехқәа рҭаара анаҩс, сара даҽазныкгьы агәра згеит Аԥсны Аҳәынҭқарреи Урыстәылатәи Афедерациеи анеицу – иаҳиааиуа дзыҟалаӡом, - иҳәеит иацҵаны Аслан Бжьаниа, Башкорҭасҭани Аԥсни аусхкқәа жәпакы рыҟны наҟ-ааҟ феида змоу аусеицура дшазхиоу атәы азгәаҭаны.

Аныҟәарақәа рышьҭахь Аслан Бжьаниа ҳамҭас иҭан ари азауад аҟны зырныҟәагақәа ҭрыжьуа аҳаирпланшәарыца акопиа еиҵа. Аԥсны Ахада иганахьалагьы иҳәеит хәызмоу ари аҳамҭа иусуратә уадаҟны иҵәахны ишимазаауа.

--


Возврат к списку