Аҧсны Аҳәынҭқарра Ахада

 

Аслан Бжьаниа: "Аҧсни Башкорҭосҭани реизыҟазаашьақәа аҧеиҧш ду рымоуп"

13.07.2022

Аслан Бжьаниа: "Аҧсни Башкорҭосҭани реизыҟазаашьақәа аҧеиҧш ду рымоуп"

"Аҧсни Башкорҭосҭани реизыҟазаашьақәа аҧеиҧш ду рымоуп, Урыстәыла аганахь ала   иалагалоу асанкциақәа ҳасаб рзуны. Асанкциақәа  ишрыцҵахо убартә иҟоуп аҟнытә Башкириантәи Аҧсны атауар аҭагаларазы алшара ҿыцқәа цәырҵуеит. Аҧсны атранзиттә дгьылҵакыра аҳасабала хархәара аиур ҟалоит".
Абри атәы иҳәеит Аслан Бжьаниа Башкорҭосҭан Ахада Ради Хабиров даниҧыла анаҩс, Уфа ажурналистәа рызҵаарақәа рҭак ҟаҵо.
Ахада иажәақәа рыла, Аҧсны хархәара аҭазар ҟалоит Урыстәылатәи Афедерациахь аимпорт аҭагаларазы апрограмма анагӡаразы. "Ари аамҭа ҿыц иаҳнаҭо ауп, ганкахьала, агәҽанызаареи ашәарҭареи ацуп, даҽа ганкахьала, аҭагылазаашьа ҿыцқәеи егьырҭ ахырхарҭақәеи цәырнагоит. Иахьа ҳара уи ҳалацәажәеит. Аспециалистцәеи изыхәҭоу аусбарҭақәеи инҭырҳәыцааны аус адырулоит аҭыҧ змоу атауареикәшара хара имгакәа амҽхак арҭбааразы. Агәуманитартә усхк аҟны, аҵараиураҟны, акультура, аспорт, амедицина ахырхарҭақәа рыла аусеицура ҳабжьазаоуп, алшарақәа ыҟоуп амедицина аусхк аҟынгьы. Ари аныҟәара иаарласны алҵшәа бзиа шаиуа агәра згоит", - иҳәеит Ахада.    
      
Башкорҭосҭан Ахада Ради Хабиров иазгәеиҭеит, Аҧсны азыҟазаашьа "раҧхьа иргыланы аемоциатә ҟазшьа шамоу". "Акыршықәса раахыс иҳабжьоу аиҩызареи, ҩ-ганктәи аусеицуреи аидгылареи уасхыр бзианы ироуеит аекономикеи, агуманитартәи, акультуратәи еимадарақәа рырҭбааразы. Ҳара уажәы атауареикәшара анализ азаҳуеит, аус здаҳулаша ыҟоуп", - иҳәеит Башкорҭосҭан Ахада.
Ради Хабиров иазгәеиҭеит, Башкорҭосҭан  зҿлымҳара шанаҭо Аҧсны иаадрыхуа ақыҭанхамҩатә аалыҵ, агәабзиарачаҧарҭақәа, атуризм. "Иахьа Аслан Гьаргь-иҧа аҭагылазаашьа ҳаиҭеит ахәыҷқәа рзы агәабзиарачаҧарҭатә ҭыҧқәа рыхәаҧшразы, хымҧада ус еиҧш аҧсшьара зҭаху ахәыҷқәа ҳамоуп, убри аҟынтә иҳаӡбеит Аҧсныҟа аҵара аминистрра аспециалистцәа ҳашьҭырц, иҟоу ахыбрақәеи аҧсшьаразы иҟоу аҭагылазаашьеи ргәаҭаразы. Иааизакны ари етап ҿыцуп", - иҳәеит Хабиров.
Башкорҭосҭан Ахада иара убас иҳәеит Аҧснытәи аколлегацәа алархәны  “имҩаҧысуа апроцессқәа актуалтә ҟазшьа рыҭаразы” аиқәшаҳаҭра ҿыц аҵаҩразы аусура ишацҵахо. «Ҳаицәажәеит ҭагалан Аҧсныҟа официалтә визитла ҳцоит ҳәа, уи ашьҭахь аиқәшаҳаҭрақәа, аилаӡарақәа, атауареикәшара аизырҳара иазку аиҿцәажәарақәа мҩаҧаҳгоит», - иҳәеит иацҵаны ареспублика Ахада

Аҧсны-уырстәылатәи аҳәааҟны иҟоу аҭагылазаашьа инамаданы ажурналистцәа рызҵаарақәа рҭакқәа ҟаҵо, Аслан Бжьаниа иҳәеит сынтәа аиасра армараиазы азыӡба шрыдыркылаз. «2014 шықәсазы изҵаҩу аидгылареи астратегиатә усеицуреи рзы аҳәынҭқаррабжьаратә Еиқәшаҳаҭраҟны иануп ауаа, аидара, атауар аҳәаа рахысра ҧкрада имҩаҧысуазароуп ҳәа, аҧкрақәа ашәарҭадара инамаданы ауп ишыҟало ҳәа.  Рыцҳарас иҟалаз, Аиқәшаҳаҭра ари апункт макьана инагӡаӡам, сгәы иаанагоит 2024 шықәсазы уи алыршахоит ҳәа. Ари акраҵанакуеит, избан акәзар, шықәсык аҩныҵҟала 11 млн раҟара ахысуеит, урҭ рахьтә  99% - УФ атәылауаа роуп. Аҧсны атәылауаа реиҳараҩыкгьы атәылауаҩра рымоуп. Ара аус зыдулатәу азҵаарақәа рацәоуп, аусура мҩаҧаҳгоит», - иҳәеит Аслан Бжьаниа.

Аҧсны Ахада иазгәеиҭеит Қырҭтәылеи Аҧсни рҳәаа аҧснытәии урыстәылатәи аҳәаахьчаҩцәа ишырыхьчо.   «Даҽ. иаҳҳә. УА аҳәаа арҧсыҽра ҟалоит, аха уи азы азыҟаҵаратә, аиҿкааратә, азинтә уснагӡатәқәа мҩаҧгатәуп», -иҳәеит Аслан Бжьаниа.

«Ҳара ҳҩызцәа зегьы бзиала шәаабеит ҳәа раҳҳәоит. Атуристтә усхк атуристцәа рыдкылара, акрырҿаҵара, рымаҵ аура иазхиоуп. Аҧсшьаҩцәа рганахьала ашәарҭадара ҳарҕәҕәеит.  Иақәнагоу аусура мҩаҧысуеит Аҩныҵҟатәи аусқәа рминистрреи, Аҷыдалкаатә ҭагылазаашьазы аминистрреи рыҟны, ҳара ҳахиоуп, сынтәатәи аамҭа бзиахоит ҳәа сгәы иаангоит», - иҳәеит Ахада.  






Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org