Аҧсны Аҳәынҭқарра Ахада

 

Аҧсни Башкорҭосҭани реизыҟазаашьақәа рыҿиара иазкыз инарҭбаау аилацәажәара

13.07.2022

Аҧсни Башкорҭосҭани реизыҟазаашьақәа рыҿиара иазкыз инарҭбаау аилацәажәара

Ҧхынгәымза 13 рзы Ареспублика Аҩны аҟны Аҧсны Ахада Аслан Бжьаниеи Башкорҭосҭан Ахада Ради Хабирови аиҳабыреи, апарламенти, аминистррақәеи, аусбарҭақәеи рхаҭарнакцәа алархәны аизыҟазаашьақәа рырҿиара азҵаарақәа  ирызкыз инарҭбааз аилатәара мҩаҧыргеит.
Арегион анапхгаҩы иаҧхьажәаҟны иазгәеиҭеит акыр шықәса раахыс аимадарақәа шрыбжьоу Башкорҭосҭани Аҧсни ажәларқәа.
"Иҳаҩсыз ашәышықәса 20-тәи ашықәсқәа рзы Поволжие амлакра  аныҟаз, иқәыҧшыз ҳреспублика Аҧсны  фатәы-жәтәыла иацхраауан. Аџьынџьтәылатә еибашьра ашықәсқәа раан Аҧсны рҽырхәышәтәуан ахәра змаз ар ҟаҧшьаа. Абри аҳаҭыр азы, уфатәи амҩадуқәа руак Аҧсны ахьӡ ахуп", - иҳәеит Ради  Хабиров.
Аҧсны атәылауаа аӡәырҩы асовет шықәсқәа раан Уфа иреиҳау аҵараиурҭақәа рыҟны аҵара рҵон. 2010 ш. рзы Аҟәеи Уфеи ақалақьқәа аиашьара рыбжьарҵеит. Ҳгәы иаанагоит, шәделегациа аара ҩ-ганктәи аизыҟазаашьақәа рырҿиара иацхраауеит ҳәа. Башкоҭорсҭан аартуп адунеи азы, иара убас аҩызцәа бзиақәа рзы”.
Аслан Бжьаниа Урыстәыла арегионқәа аус рыцура иамоу аҵак ду азгәаҭаны, Башкорҭосҭан аделегациа Аҧсныҟа ааҧхьара аиҭеит.  

"Ҳазҭагылоу аамҭазы аҳәынҭқаррабжьаратә ҩаӡара аҭаны азакәанҧҵаратә процессқәа асинхронизациа рзаҳуеит адәныҟаекономикатә еимадарақәа ҳарццакырц азы, убарҭ рхыҧхьаӡараҿы иҟоуп Башкорҭосҭангьы", - иҳәеит Аслан Бжьаниа.
Уи иажәақәа рыла, Аҧсны  гәацҧыҳәарала аимпортҧсахреи атуризм аҿиареи ирызку урыстәылатәи апрограммақәа рыҽрылархәра иазхиоуп. 2024 ш. "Аҟәа аҳаиртә баҕәаза ааҳартуеит, ари урыстәылаа рзы даара иманшәалахоит. Иара убас ҳара Амшын еиқәа аҿықәаҿы ахәыҷқәа ргәабзиарачаҧарҭа аргыларазы аҭыҧ шәаҳҭар ҳалшоит", - иҳәеит аҳәынҭқарра Ахада.

Башкорҭосҭан Аҧыза-министр Андреи Назаров иазгәеиҭеит аҩ-республикак рыдәныҟаекономикатә еимадарақәа рырҿиаразы алшара бзиа шыҟоу.

«Башкорҭосҭан активла аус ацрыуеит 128 тәыла. Арегион 2021 ш. еизаку адәныҟахәаахәҭратә еикәшара 4,5 млрд доллар еиҳауп. Убри аан Аҧсны ахәҭаа иартәо 14,6 млн доллар роуп, – иазгәеиҭеит Андреи Назаров. - «Ҳара ҳреспублика Аҧснынтәи Урали Поволжиеи рреигионқәа рышҟа атауар адәықәҵаразы логистикатә центрны иҟалар алшоит. Убасалагьы, ақыҭанхамҩатәи ааглыхратәи аалыҵ Аҟәаҟа ашьҭра ҟалоит.

Аҧсны Жәлар Реизара - Апарламент Аиҳабы Лаша Ашәбеи Башкорҭосҭан Ареспублика Курултаи - Аҳәынҭқарратә Еизара ахантәаҩы Константин Толкачиови реиҧылараан апарламентбжьаратә еимадара аҧеиҧш иалацәажәеит.

Анаҩс, имҩаҧысит амуниципалитетқәа рыбжьара аусеицуразы адокументқәа рыҵаҩра. Убасала, Башкорҭосҭан Бурзиантәии Мелеузовтәии араионқәеи Аҧсны Аҳәынҭқарра Очамчыра араиони Гагра араиони аиқәшаҳаҭрақәа рыбжьарҵеит. Амуниципалбжьаратә еиқәшаҳаҭрақәа адәныҟаекономикатә еимадарақәа активла рыҿиара алдыршоит.

Аусуратә еиҧылара хыркәшо, Башкорҭосҭан Ахада Ради Хабиров ареспубликақәа рыбжьара аиҩызареи аусеицуреи рырҕәҕәараҟны илагаламҭазы Аҧсны Ахада Аслана Бжьаниа ианеишьеит Ажәларқәа реиҩызара аорден.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org