Аҧсны Аҳәынҭқарра Ахада

Аԥсны Аҳәынҭқарра Ахада Аслан Бжьаниа асабша, ашьыжь Гәылрыԥшь араион аҟны Кациқыҭ икьакьоу абзазаратә црыҵқәа рышьҭаҵарҭазы аргыларатә усурақәа шымҩаԥысуа гәеиҭеит.

Ари аобиект аҟны аусурақәа хацыркын 2021 шықәса жьҭаарамзазы. Имҩаԥгоуп 2,4 га зҵазкуа аҭыжаара аҟаҵаразы аусура. Аҭыԥ зегьы ааизакны иаҵанакуеит – 12 га.
Шьаҭанкылатәи аргылара аусбарҭа аиҳабы Ҭемыр Агрба Аҳәынҭқарра Ахада адырра ииҭеит аусурақәа рымҩаԥгараан ишышьақәыргылахо адизинфекциаҟаҵаразы амыруга агәам-самеихшага цәаҳәа 12 пост рзы, акапанырҭа, атехниказы ананыра, аобиект фымцала аиқәыршәара, аусзуҩцәа рзы анхарҭа-контеинерқәа, урҭ рымаҵ ауразы зыда ԥсыхәа ыҟам аимадарақәа. Иара убас аобиект аҟны иазԥхьагәаҭоуп агәам-сам шьҭаҵарҭа аӡцарҭақәа ррыцқьаразы ахыбра.

Агәам-сам шьҭаҵарҭа аргыларазы аусурақәа рзеиԥш харџьынҵа иартәоит 112млн.  820 нызқь маат.
Аусмҩаԥгатә афинансзоужьра еихшоуп ҩышықәса рзы: 2021 ш. – 43 646 000 мааҭ., 2022 ш. – 69 174 000 мааҭ.
Ҳазҭагылоу аамҭазы иазоужьуп 44 168 954 мааҭ.

Аргыларатә усурақәа аҿазҵаз  АА Шьаҭанкылатәи аргылара аусбарҭа ауп, анардадкылаҩыс иамоу ЗҲӘА «СитиЛайт» ауп.

Ахада аусурақәа рымҩаԥысшьа ибзиоуп ҳәа ахиҳәеит, иагьазгәеиҭеит ас еиԥш амҽхак змоу аргыламҭа иамоу аҵак ду. Аҳәынҭқарра Ахада иаҵшьны иҳәеит аекологиатә нормақәа рықәныҟәара хымԥада ишаҭаху, иазыԥҵәоу аграфикгьы ишаҵамхаракәу.

Аргылара мҩаԥысуеит 2020-2022 шш. Аԥсны Аҳәынҭқарра  асоциал-економикатә ҿиара ацхрааразы аинвестициатә программала.