Аҧсны Аҳәынҭқарра Ахада

 

Аслан Бжьаниа амедицинатә еилазаара Амедицинатә усзуҩы имш рыдиныҳәалеит

17.06.2022

Аԥсны Аҳәынҭқарра Ахада Аслан Бжьаниа амедицинатә еилазаара Амедицинатә усзуҩы имш рыдиныҳәалеит.

Акыр иаԥсоу аҩызцәа, амедицинатә усзуҩцәа зегьы, ишәыдысныҳәалоит иахьатәи шәзанааҭтә ныҳәа.
Шәара шәзанааҭ аҳаҭыр ду, ауаҩра зцу занааҭуп. Гәык-ҧсык ала зегьы иҭабуп ҳәа шәасҳәоит шәџьабаазы, хамеигӡарада имҩаԥыжәго шәусуразы, ишәыду ауалҧшьа еилкааны шәахьазнеиуазы. Шәзанааҭ ҧсшьара аздырӡом. Иахьа шәара шәахьтә аӡәырҩы шәзанааҭтә ныҳәа аусураҿы иазгәашәҭоит.

Шәара еснагь аҧхьа шәгылан аҿкычымазара ҳаҿагыланы имҩаԥаҳгоз ақәҧараҿы. Тәамҩахә шәымамызт, шәҭаацәа шәрыгхон, усҟан, еснагь еиԥш, шәара шәзы ачымазцәа рыԥсҭазаара аиқәырхара еиҳа ихадаран.

Аҧсны Жәлар Реизарахь иҟасҵаз Ацҳамҭаҿы исҳәеит, Ковид-19 агәабзиарахьчара асистемазы ԥышәара дуны ишыҟалаз. Ҳарҭ иҳалшоз зегьы ҟаҳҵеит ахәышәтәырҭатә усбарҭақәа зыда ԥсыхәа ыҟам амаҭәахәқәа рыла реиқәшәаразы.

Ҳәарада, аҳәынҭқарра аринахысгьы иахьынӡалшо агәабзиарахьчара аусхк ацхыраара анаҭалоит.

Уажәы аиҭашьақәыргыларатә усурақәа азгәаҭоуп Иҷыдоу аҧсихоневрологиатә хәышәтәырҭеи Ареспубликатә хәыҷтәы хәышәтәырҭеи  рыҟны.

Акыр иаԥсоу аҩызцәа, ишәзеиӷьасшьоит шәнапы злаку аус аҟны аихьӡарақәа, ҳара иҳашәҭо агәабзиара шәаргьы ишәыгымзааит!

Даҽазныкгьы иахьатәи аныҳәа шәыдысныҳәалоит!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org