Ахада Сезаи Папба иԥсҭазаара иалҵра инамаданы адышшылара ҟаиҵеит

Аԥсны Аҳәынҭқарра Ахада Аслан Бжьаниа Сезаи Папба иԥсҭазаара иалҵра инамаданы адышшылара ҟаиҵеит.

«Гәалсра дула иҳадаҳкылеит Ҭырқәтәыла инхоз ҳџьынџьуаҩ Сезаи Папба ачымазара бааԥс иахҟьаны иаамҭаӡамкәа иԥсҭазаара иалҵра ахҭыс.
Сезаи Паба Аҧсны Аџьынџьтәылатә еибашьра ашықәсқәа раҧхьагьы иҭоурыхтә ҧсадгьыл дадҳәалан, ҳхылҵшьҭрақәеи ҳареи ҳаимадара арӷәӷәара дашьҭан, ари аус акыр дазааԥсахьан.

Сезаи Аԥсныҟа изныкымкәа даахьан, акыраамҭагьы ара дынхон, аус иуан.1999 шықәсазы ажурналист, аиҭагаҩ иаҳасабала Аԥсны Аҳәынҭқарра Ахада Владислав Арӡынба Ҭырқәтәыла иҟазаараан, Сҭамԥыл апресс-конференциа мҩаԥигон.

Аҳәынҭқарратәи ауаажәларратәи усзуҩы, гәыла-ҧсыла зыуаажәлар ирыдҳәалаз Сезаи Папба иԥсҭазаара иалҵра цәыӡ дуӡӡоуп аԥсуа жәлар зегьы рзы.
Гәалсра дула ҳрыдышшылоит Сезаи Папба иуацәеи иҭынхацәеи.  

Уи игәалашәара лаша наунагӡа ҳгәалашәараҿы иаанхоит».  


Возврат к списку