Ахада Иреиҳаӡоу Аӡбарҭа аколлектив Ахантәаҩ ҿыц дыдирдырит

Ахада Иреиҳаӡоу Аӡбарҭа аколлектив Ахантәаҩ ҿыц дыдирдырит

Аԥсны Аҳәынҭқарра Ахада Аслан Бжьаниа аколлектив дыдирдырит Иреиҳаӡоу Аӡбарҭа Ахантәаҩ ҿыц Саида Быҭәба.

Апарламент аилатәараҟны, иахьа хәажәкырамза 21 азы адепутатцәа Саида Быҭәба Аԥсны Аҳәынҭқарра Иреиҳаӡоу Аӡбарҭа Ахантәаҩыс далырхит.  
Ахада иазгәеиҭеит акырӡа зҵазкуа ари аҳәынҭқарратә институт аҟны Иреиҳаӡоу Аӡбарҭа алахәцәа анапхгаҩ ҿыци дареи рыбжьара аусуратә еизыҟазаашьақәа шьақәгылап ҳәа дшақәгәыӷуа. «Абри иақәгәыӷуеит ҳара ҳауаажәлар»,- иҳәеит аҳәынҭқарра Ахада.
Аслан Бжьаниа иаҵшьны иҳәеит аӡбаратә еилазаара ҳҳәынҭқарра ашьаҭақәа, азинтә леишәа рырӷәӷәареи азинӡбара ашьақәыргылареи рыҟны ихадароу ароль шынанагӡо.
  «Шәаргьы ҳаргьы ҳаҟнытә акрызҵазкуа, ииашоу аусқәа ирзыԥшуп. Ауаа ақәнага ыҟазар рҭахуп, иааидкыланы, амчхара агәра ргартә, аиаша иқәныҟәо иҟазар рҭахуп, жәаҳәарада, абри аганахьала шәара шәинститут аԥхьа игылоуп, ихадароуп.
Саида Быҭәба аҳәынҭқарра Ахадеи Аԥсны Жәлар Реизара – Апарламент адепутатцәеи иҭабуп ҳәа ралҳәеит илырҭаз агәрагаразы. «Сара сзы ари ҭакԥхықәра дуӡӡоуп. Аӡбаратә мчхара – хазы игоу амчхара хкуп»,- лҳәеит лара.

Быҭәба атәыла анапхгара агәра длыргеит аӡбаҩцәа зегьы аӡәк еиԥш еидгыланы аус шыруло ламысцқьала, қәнагала, обиективла, ганкы иадымгылакәа.  «Ҳаидгыланы аус еицаҳур, Аԥсны Аҳәынҭқарра Аконституциеи азакәанԥҵареи еиламгакәа азинӡбара анагӡараҟны ҳзеиԥш хықәкы анагӡара ҳалшоит»,- лҳәеит лара, аколлектив лгәыӷрақәа шадылҳәало азгәаҭаны.
.


Возврат к списку