Аҧсны Аҳәынҭқарра Ахада

 

Ахада Урыстәыла аусқәа рзы Аҧсны иҟоу Аамҭалатәи агәрага Максим Литвинов дидикылеит

25.02.2022

Ахада Урыстәыла аусқәа рзы Аҧсны иҟоу Аамҭалатәи агәрага Максим Литвинов дидикылеит

Аԥсны Аҳәынҭқарра Ахада Аслан Бжьаниа Урыстәыла аусқәа рзы Аԥсны Аамҭалатәи агәрагас иҟоу Максим Литвинов дидикылеит.

Жәабранмза 25 рзы имҩаԥысит Аԥсны Аҳәынҭқарра Ахада Аслан Бжьаниеи Урыстәыла аусқәа рзы  Аԥсны Аамҭалатәи агәрагас иҟоу Максим Литвинови реиԥылара.
Аиԥылара аартуа, Ахада иҳәеит Ареспубликаҟны зҿлымҳара аҭаны ишацклаԥшуа Украина имҩаԥысуа ахҭысқәа.

«Ҳара, ҳәарада, Урыстәылатәи Афедерациа анапхгара иаднакылаз азыӡба ҳадгылоит, ибзианы еилаҳкаауеит арҭ азыӡбақәа инарҵауланы азхәыцра ашьҭахь ишрыдыркылаз, уи ада даҽа мҩакгьы шыҟамыз.
Урыстәыла анапхгара адәныҟатәи аполитикаҟны есқьынгьы аҭынчмҩа, агәылеимабзиара апринципқәа ишрықәныҟәоз азы гәыҩбара ыҟамызт ахаангьы. Аха, рыцҳарас иҟалаз, уи заҳараны иҟаз ирмаҳаит аҟнытә имҩаԥысуа апроцессқәа мҩаԥысуеит» - иҳәеит аҳәынҭқарра ахада.

Урыстәыла аусқәа рзы Аԥсны Аамҭалатәи агәрагас  иҟоу Максим Литвинов Аԥсны Аҳәынҭқарра анапхгара иҭабуп ҳәа реиҳәеит Донецки Лугански рыҟнытә ахҵәацәа рыдкылареи нхарҭала реиқәыршәареи рзы, иара убас иҳәеит Урыстәыла анапхгара аҵыхәтәантәи амшқәа рзы ирыдыркылаз азыӡба мзызқәас иамоу атәы.  
Уи иаҵшьны иҳәеит, НАТО ҳҳәаақәа рзааигәахара иахьалагаз аҟнытә Урыстәыла ашәарҭадара ахьчара адагьы, аашықәса раахыс агәаҟра иҭагылоу Донбасс ауааԥсыра рыхьчара мзыз хаданы ишыҟоу.

Максим Литвинов иазгәеиҭеит, абри аамҭа зегьы мраҭашәаратәи атәылақәеи Киеви еилых ҟамҵакәа, аҭынч уааԥсыра рганахьала Украина арбџьар мчқәеи амилаҭтә баталионқәа ҳәа изышьҭоуи рыҟнытә амч ахархәара афактқәа мап шацәыркуаз.

«Урҭ Донбасс иҟаҵәҟьаз аҭагылазаашьа еицаркырц иаҿын Киев ирыланаҳәоз афактқәа роуп ииашоу ҳәа азгәаҭаны. Мраҭашәара, аиаша ҳҳәозар, имҩаԥысуаз аибашьратә цәгьоурақәа ирыдгылоит",- иҳәеит адипломат.
Уи иажәақәа рыла, «ари ҳара иаҳгәаланаршәоит 30 ш. рышьҭахгьы мраҭашәаратәи аполитикцәа мап зцәыркуа, рыбжьгьы зықәдмырго Аҧсны Аџьынџьтәылатә еибашьра инамаданы иҟоу аҭагылазаашьа. Ас еиҧш иҟоу ацәалацәажәара иахҟьаны аҧсуа жәлар ахәҭакала жәларбжьаратәи ауаажәларра иалкны иҟоуп, Украина акәзар,  аибашьра цоит».

Урыстәыла аусқәа рзы Аҧсны Аҳәынҭқарраҿы иҟоу Аамҭалатәи агәрага иазгәеиҭеит, «Еиду Америкатәи Аштатқәа зхадараҿы иҟоу мраҭашәара, жәларык зеиӷьыҟам ауп ҳәа иҧхьаӡаны, егьырҭ ажәларқәа тәамбашақә ирызнеиуанаҵ, сара схада ишиҳәаз еиҧш, иаҧнаҵаз амц империа ООН аҿы, иара убас аҭынчреи аҭышәынтәалареи рышьақәыргылара иазку егьырҭ жәларбжьаратәи афорумқәа рҿы ҧыжәара аманаҵы, ҳарҭ есааира ана-ара иҿыцу аимакқәа ҳазцәырҵлоит    Аҧсны, Аахыҵ-Уаҧстәыла, Донбасс, иара убас ԥасатәи Иугославиа рыҟны ишыҟаз еиԥш» ҳәа.

«Ҳара ҳгәыӷуеит УА ирыланаҳәаз ахықәкқәа рынагӡара алыршахоит ҳәа излауала иреиҵаӡоу ацәыӡқәа рыла. Ҳара аринахысгьы, иҳалшо ала, ДЖӘР-еи ЛЖӘР-еи ртәылауаа агуманитартә цхыраара рыҭара ҳазхиоуп. Ҳара ари аҩыза ҳхаҳгахьеит азы ибзианы еилаҳкаауеит ажәлар зҭагылоу, инарҵаулангьыы ҳазнеиуеит», ҳәа азгәеиҭеит Ахада..
Аиԥылараан Максим Литвинов Аԥсны Ахада ииҭеит Донбасс ауааԥсыра 2014 шықәса раахыс изҭагылаз агәаҟра зырҵабыргуа афактқәа реизга.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org