22.02.2022
Аҧсны Аҳәынҭқарра Ахада Аслан Бжьаниа Ҟабарда-Балкариатәи Ареспублика ԥасатәи ахада, Урыстәылатәи Афедерациа асенатор Арсен Каноков ииубилеи идиныҳәалеит.
"Ҳаҭыр зқәу Арсен Башир-иԥа, гәык-ԥсык ала ишәыдысныҳәлоит Шәиубилеи.
Шәара аԥышәа змоу аҳәынҭқарратә усзуҩы, хьаҵрак ҟамҵакәа зхықәкы иазнеиуа аполитик, аџьатә усура аамҭақәа зегьы раан шәхы аашәырԥшуеит зыҩаӡара ҳараку апрофессиаонал иаҳасабала.
Ҟабарда-Балкариатәи Ареспублика ахадас шәаныҟаз, Шәара атәыла аизҳазыӷьареи аҿиареи рус аҟны шәлагаламҭа ахә ашьара уадаҩуп. Иахьагьы шәыжәлар рыхьӡала ааԥсарада аусура шәаҿуп.
Ҳаҭыр зқәу Арсен Башир-иԥа, Шәара Аԥсны Аҳәынҭқарразы ҩыза дууп.
Абри аныҳәамш аҽны гәыкала ишәзеиӷьасшьоит шәыгәҭакқәа қәҿиарала рынагӡара, лыҵшәа змоу аусура, анасыԥ".