Ҳаҭыр зқәу ҳауаажәлар!
Хара имгакәа ҳтәылеи ҳауаажәлари рзы имариамыз, уадаҩрала иҭәыз ашықәс ахыркәшарахь инеиуеит.
Аанкылашьа змам аҿкы чымазара ҳауаажәлар ргәабзиареи рыԥсҭазаареи, асоциалтә-економикатә ҭагылазаашьеи, иааизакны, ҳҳәынҭқарра аԥсҭазаара аганқәа зегьи ирнымԥшыр амуит. Абиуџьеттә иреиҳау ахәҭак аҿкы аҿагыларазы, агәабзиарахьчара асистема ацхраарахьы идәықәҵоуп. Абри иахҟьаны, ҳәарада, егьырҭ аусхкқәа ирыгхеит – урҭ рзы иазԥхьагәаҭаз дара рҟынӡа изымнаӡеит.
Аха ауадаҩрақәа шыҟазгьы, аиҳабыреи аҭыԥантәи ахаланапхгаратә усбарҭақәеи русура иабзоураны иалыршахеит абиуџьет апрофицит. Аинвестициатә программа аҳәаақәа ирҭагӡаны зыда ԥсыхәа ыҟам аинфраструктуратә проектқәа рынагӡаразы акрызҵазкуа ацхыраара ҳауеит стратегиатә партниорс иҳамоу - Урыстәылатәи Афедерациа аҟнытә. Иҳамоу ауадаҩрақәа рыҟны, хымԥада, иарӷьажәҩаны иҳадгылоуп ҳдиаспора.
Аҭагылазаашьа мариаӡам, излауала уи арҽеира ҳаҿуп, убри инаваргыланы, урыстәылатәи ҳҩызцәеи ҳареи ҳаидгыланы ҳҳәынҭқарра аҿиаразы акырӡа аҵакы змоу апроектқәа ҳнапы рылакуп. Ари ареспублика газла аиқәыршәара, ақыҭанхамҩеи, ааглыхреи, акурорттә индустриеи рырҿиара, аҳаиртә еимадара аиҿкаара уҳәа уб.егь.
Ари зегьы аекономикатә ҭышәынтәалара, ҳтәылауаа рсоциалтә ԥсҭазаара ахаҭабзиара аиӷьтәра, аусурҭа ҭыԥқәа раԥҵара иазкуп.
Ҳхатә харџьқәа рыла анхаратә программа ҩаҧхьа афинансқәа азоуҳажьуеит излымшо аҭаацәарақәа нхарҭа ҭыԥла реиқәыршәаразы.
Убас шакәугьы, ҳәарада, ауадаҩрақәа жәпакы ӡбамкәаны иаанхоит. Иҧсыҽу аекономикаҿы, лассы-лассы аполитикатә кризис аҭыҧ ахьамоу иҭышәынтәалам аҳәынҭқарраҿы урҭ риааира мариам. Абас еиҧш иҟоу, ҭакҧхықәрада даҽа акциак амҩаԥгара, ҽеила иӷәӷәам ҳҳәынҭқарра ахырбгарахьы инанагоит, ҭоурыхла иаҳдыруеит-аргылара акыр аамҭа аҭахуп, ахырбгалара сааҭк ауп. Изныкымкәа ишыҟалахьоу еиҧш, ари аҭакҧхықәра ныҟәзымго политикцәақәак рхатә амбициақәа ирыхҟьоит.
Ҳаҭыр зқәу ҳауаажәлар! Ишыжәдыруа еиҧш, оппозициатә еиҿкаарақәак рхаҭарнакцәа, уаҵәы, Аҟәа ақалақь аҿы изакәантәым амитинг амҩаҧгара ргәы иҭоуп.
Аҧсны Аҳәынҭқарра Аконституциеи азакәанқәеи ҳауаажәлар, иара убас ауаажәларра-политикатә еиҿкаарақәа азин рнаҭоит иарбан зҵааразаалак азы иаартны ргәаанагара аҳәаразы, иара убас атәыла анапхгара рганахь ала ргәынамӡара аарҧшразгьы. Аха, ари зегьы азакәанҧҵара еиланамгозароуп, уи аҳәаақәа ирҭагӡазароуп.
Ҳара иӡбам азҵаарақәа маҷымкәа ишыҟоу ҳдыруеит, аха ари иахырҟьаны аҳәынҭқарра аҵшәаара ҳақәшаҳаҭым. Убри аҟнытә изакәантәым, Аконституциа иаҿагылоу аҽазышәарақәа згәы иҭазкыз зегьы ргәырҽанаҳҵоит. Азинхьчаратә усбарҭақәа азакәан еилазгаз рықәнага иақәдыршәоит.
Еиҭасҳәоит, ҳарҭ иаарту иконструктивтәу адиалог ҳадгылоит, еиуеиҧшым азҵаарақәа рзы аиҿцәажәарақәа ҳрызхиоуп. Аха урҭ ацивилизациатә ҟазшьа рымазароуп, атәыла ашәарҭара иҭанамыргылароуп.
А.Бжьаниа,
Аҧсны Аҳәынҭқарра Ахада
2021 ш. ҧхынҷкәынмза 20.