Ахада Гәылрыԥшь араион актив злахәыз анҭыҵтәи аилацәажәара мҩаԥигеит

Ахада Гәылрыԥшь араион актив злахәыз анҭыҵтәи аилацәажәара мҩаԥигеит

Аԥсны Аҳәынҭқарра Ахада Аслан Бжьаниа Гәылрыԥшь араион актив злахәыз анҭыҵтәи аилацәажәара мҩаԥигеит.

Гәылрыԥшь араион Администрациа ахада Аслан Бараҭелиа аҳәынҭқарра ахада адырра ииҭеит 10 мыз рыҩныҵҟала имҩаԥгаз аусуразы. Уи иажәақәа рыла, араион абиуџьет ахашәалатә хәҭа абҵарамза 1 азы инагӡоуп 101,6 %. Аплан ала иарбоу 158 461,7нызқь мааҭ раан ааимҭа иартәеит 160 982,2 нызқь мааҭ. «Ахатәы хашәалақәа планла иарбаз 48 462,5 нызықь мааҭ раан идыртәеит 57 988,1 нызқь мааҭ. Ҵыԥх ҳазҭагылоу аамҭа иаҿырԥшны ахатәы хашәалақәа ирызҳаит 8 527,1 нызқь мааҭ рыла»,- иҳәеит А. Бараҭелиа.

   Ашәахтәтәи даҽа шәатәтәқәаки рааимҭақәа идыртәеит  65 524,1 нызқь мааҭ. Планла иарбаз 46 918,0 нызқь мааҭ 139,7% иазҳаит. Араион ахада иара убас иҳәеит аплантә рбагақәа рынагӡара атәы ашәахтә шәатәтәы ахкқәа зегьы рыла, амазаразы ашәахтә ада.   «10 мыз рызтәи аплан - 1 912.8 нызқь мааҭ аан уи анагӡара иартәеит 1 233,3 нызқь мааҭ мамзаргьы 64,5%.  Ишәам мзыз хадас иамоуп анаплак дуқәак адгьыл азы ирымшәаз ашәахтәқәа», - иазгәеиҭеит Бараҭелиа. Адгьыл азы ашәахтәшәара иартәеит 191,6%,   аплан аҟны иарбаз 1 667,3 нызқь мааҭ аан ааимҭа иартәеит 3 194,5 нызқь мааҭ.

Бараҭелиа иазгәеиҭеит апроцент аҳаракра зыбзоуроу 2020 шықәсазтәи ауал ашәара шакәу.  Ашәахтә шәатәқәа рыхкқәа зегьы рыла ауал азеиԥш еицҵалыҵ абҵарамза 1 азы иартәеит 24 360 нызқь мааҭ, убрахь иналаҵаны 4 974,6 нызқь мааҭ  - ҳазҭагылоу аамҭазы, 19 386,3 нызқь мааҭ - ипроблематәқәоу.
  Администрациа ахада аҳәынҭқарра ахада изеиҭеиҳәеит аԥсабаратә рыцҳара ахҟьа-ԥҟьақәа раԥыхра, аепидемиологиатә ҭагылазаашьа, афымцамч ахәԥса ашәара,  аинвестпрограмма анагӡашьа, ацитрустәқәа рҽаҩра уҳәа уб. егьырҭ азҵаарақәа жәпакы инарымаданы иҟоу аҭагылазашьа атәы.  
Аслан Бжьаниа аусуратә ныҟәарақәа реихшьала ҟаиҵеит.

Аҳәынҭқарра Ахада иқәгылараҟны иҳәеит:

«Ари ашықәс ганкахьала имариамызт, даҽаганкахьала, даара иманшәалан, атуризм аҿиара инамаданы.  Араион аҟны аԥышәа змоу анапхгаҩцәа, акыр шықәса аус зухьо ауаа ыҟоуп. Ара иҟаҵоу рацәоуп, ахаҭабзиарагьы амоуп. Аха уаҩы ибартә иҟоуп ҳалшарақәа раасҭа апроблемақәа шеиҳау. Араионтә биуџьет ахатәы биуџьет 58 млн рҟынӡа артәоит. 100 млн мааҭк рҟынӡа ареспубликатә биуџьет аҟнытә иаиуеит. Арҭ ацифрақәа хшыҩзышьҭра ашәҭарц сҭахуп аиҳабыра Гәылрыԥшь араион хылаԥшра арҭом ҳәа шәгәы иаанамгарц азы. 2019 - 2021 шш. аинвестпрограммала Гәылрыԥшь араион иазԥхьагәаҭоуп 431 миллион мааҭ. Убри аан ари Аинвестпрограмма шышьақәыргылаз ала, Гал араион азы мааҭкгьы арбаӡамызт.  

Гәылрыԥшь араион аҟны иҟоуп алшара, раԥхьа инаргыланы уааԥсырала. Убри адагьы, иманшәалоуп агеографиа, иуникалтәу амшынҿықәтәи ацәаҳәа.  Зҵаараны иҟоу – арҭ алшарақәа хархәашьас ирыҭатәу ауп. Аҳақьымцәеи арҵаҩцәеи руалафахәқәа урыстәылатәиқәа ирҿырԥшны ицәгьамшәа иҟоуп, аха урҭ акырӡа иреиҳазаргьы ҟалон араион аҟны иҟоу алшарақәа хархәара рыҭазар.

Ковид иадҳәалоу апроблемақәа ртәы ҳҳәозар, аҳәынҭқарра аганахьала миллионла аԥара ақәхарџьуп. Миллиардк ҳазааигәахоит жәларбжьаратәи аиҿкаарақәеи, ҳҩызцәеи рыцхыраара алаҳҵозар.
Уажәы авакцина ҳауит, хымԥада алаҵа злазҵараны иҟоу ауааԥсыра ркатегориақәа инарыдҳәаланы азыӡба шьҭаҳхраны ҳаҟоуп.  Уи арҵаҩцәеи аҳақьымцәеи роуп, еснагь ауаа рацәа ирыдҳәалоу. Агәабзиарахьчара апроблемақәа ковид аҳәаа иҭыҵуеит, аха уи иахьа хырԥашьа змам. Аҳәынҭқарра иалшо зегьы ҟанаҵоит. Ахәышәтәырҭақәа аус руеит, иаҭаху ала аиқәыршәара ҳахылаԥшуеит, ҳәарада, ҳазхьымӡогьы ыҟоуп, аԥара ҳазхаӡом азы.  

Араион аҟны ауаа беианы инхозароуп. 28 шықәса ҵуеит аибашьра еилгеижьҭеи, ауаа рыԥсҭазаашьа еиӷьзар рҭахуп, уи еилкаауп. Амҩақәеи аӡи рыла ахьеиқәҳаршәо - уи бзиоуп.  Аха џьоукы ахаҳәтә шәышықәсахь архынҳәра ҳаҿуп рҳәоит. Сара уи алҵра ҳаҿуп сҳәарц сҭахуп. Уи ус имариаӡам, аха ҳамчқәа еибаҳҭароуп.

Афымцамч ахәԥса ашәара атәы ҳҳәозар, шәааи ҳазҵаап, Гәылрыԥшь араион аҟны аԥсҭазаара аҩаӡара Очамчыра араион аҟны аасҭа еиҳаума?
Сара еиҵаӡам ҳәа сгәы иаанагоит. Ус иҟамлароуп, очамчыра араион аҟны афымцамч ахәԥса аизгаразы аҭагылазаашьа шәара шәыҟнеиԥшшәа иҟоуп. 600 мааҭ ҳәа анорма шьақәыргылан аԥхьаӡагақәа змам рзы. Еизгазма ҩнаҭацыԥхьаӡа рыҟны убри а-600 мааҭ?  
Ахада араион анапхгаҩы идиҵеит афымцамч ахәԥса аизгара аизырҳара. «Алҵшәа ахьыҟамло, иаанаго акоманда ааԥсара ауп, ус анакәха иԥсахтәуп. Аӡын ааигәахеит, сынтәа иаҳзоужьыз алимит нҵәеит, ҳҩызцәа ҳрыҳәароуп 1 млрд кВт/с ҳарҭарц азы. Ҵыԥх сара Москва сцеит, срыҳәеит азы ацхыраара ҳарҭеит. Еиҭа ҳрыҳәароуп, аха ҳааҟәымҵӡакәа ҳазрыҳәалаӡом.  



Возврат к списку