Аҧсны Аҳәынҭқарра Ахада

 

Аҳәынҭқарратә бызшәа амш аҽны Ахада Аԥсны жәлар рышҟа Ааԥхьара ҟаиҵеит

27.10.2021

Аҳәынҭқарратә бызшәа амш аҽны Ахада Аԥсны жәлар рышҟа Ааԥхьара ҟаиҵеит

Аԥсны Аҳәынҭқарра Ахада Аслан Бжьаниа Аҳәынҭқарратә бызшәа амш аҽны Аԥсны жәлар рышҟа Ааԥхьара ҟаиҵеит.

«Акыр иаԥсоу ҳауаажәлар!

Иахьатәи амш – жьҭаармаза 27 ҳмилаҭ, ҳҭоурых, раԥхьа иргыланы, Аԥсуа ҳәынҭқарразы акырӡа  зҵазкуа рыцхәуп.

Ҳхатәы бызшәа Аԥсны Аҳәынҭқарра иашьагәыҭу аԥсуа милаҭ реиқәырхараҟны, рыҿиараҟны инанагӡо ароль дуӡӡа ҳасаб азуны, 2007 шықәсазы Аԥсны Жәлар Реизараҟны ирыдыркылеит «Аԥсны Аҳәынҭқарратә бызшәазы» Азакәан.

Ари Азакәан инақәыршәаны Аԥсны Аҳәынҭқарра атәылауаа аҳәынҭқарратә бызшәа рдыруазароуп, ҳҳәынҭқарратә ԥсҭазаара аганқәа зегьы рыҟны хархәара амазароуп.

Аҳәынҭқарра иадуп уи социалла ахьчара - арҵара, арҿиара, афункциақәа рынагӡаразы аҭагылазаашьа аԥҵара, иара убас уи ахьчара, хылаԥшра аҭара.

Ҳазҭагылоу аамҭазы аҳәынҭқарратә бызшәа официалла иамоу адгылара инаваргыланы, иҟазароуп ҳуаажәларра рганахьала абызшәа аиҷаҳара, агәбылра, агәрагара.

Аҳәынҭқарратә бызшәа аиқәырхараҟны иахьа иҟоу ашәараҭара азгәаҭаны, уи аҳаҭыр ашьҭыхразы, амҽхак арҭбааразы дарбанзаалак Аԥсны атәылауаҩ иара ада ԥсыхәа имамкәа иҟаҳҵароуп.

Сгәы иаанагоит, Аԥсны аиҳабыреи ҷыдала амилаҭтә интеллигенциеи рымч еибырҭароуп ҳҳәынҭқарреи ҳмилаҭи реиқәырхараҟны аԥхьа игылоу абри аус амҩақәҵараҿы! Ашәышықәсақәа иргәылганы, иахьа уажәраанӡа еиқәырханы иааҳго, ҳажәлар ахьыҟазаалак аӡәыкны еидызкыло ҳбызшәа Аԥснеиԥш уи анҭыҵгьы иқәҩларц азы!»




Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org