Аҧсны Аҳәынҭқарра Ахада

 

Ахада Платон Бебиа иԥсҭазаара иалҵра инамаданы адышшылара ҟаиҵеит

27.09.2021

Аԥсны Аҳәынҭқарра Ахада Аслан Бжьаниа еицырдыруа аԥсуа шәҟәыҩҩы, апоет, аиҭагаҩ, апублицист Платон Хәамԥа-иԥа Бебиа иԥсҭазаара иалҵра инамаданы иуацәеи иҭынхацәеи дрыдышшылеит.

"Гәалсра дула срыдышшылоит зыԥсҭазаара иалҵыз Аԥсны Жәлар рпоет, СССР-и, Аԥсни, Урыстәылеи рышәҟәыҩҩцәа рхеилак алахәҩы, Аԥсны акультура зҽаԥсазтәыз аусзуҩ, Д. Гәлиа ихьӡ зху Аҳәынҭқарратә премиа алауреат, "Ахьӡ-Аԥша" аорден III аҩаӡара занашьоу Платон Бебиа иуацәеи иҭынхацәеи.

Платон Бебиа иԥсҭазаара иалҵра цәыӡ дууп аԥсуа жәлар рзы. Зыжәлар рхьаа зхьааз, зырҿиаратә аԥҵамҭақәа рыла Аԥсны акультураҟны, аԥсуа литература аҭоурых аҟны имыӡуа ишьҭамҭа аниҵеит. Иааԥсара рыдуп агазеҭ "Аҧсны ҟаҧшь", ажурнал "Амцабз", ашәҟәҭыжьырҭа "Алашара". Авторс дрымоуп хыҧхьаӡара рацәала ажәеинраалақәа, абалладақәа, апоемақәа, ажәабжьқәа, иара убас ароманқәа "Ашьацҳәа", "Ақьачақьцәа".  Иҩымҭақәа еиҭагоуп аурыс, аукраин, аерман бызшәақәа рахь. Платон Бебиа дырдыруеит иара убас еиҭагаҩык иаҳасабалагьы.

Платон Хәамԥа-иԥа Бебиа аҧсуа жәлар ргәалашәараҟны дынхоит зхы-зыҧсы аԥсуа культура, аԥсуа литература арҿиара иазкыз иналукааша ашәҟәыҩҩы, арҿиаҩы иаҳасабала.".




Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org