Аҧсны Аҳәынҭқарра Ахада

 

Имҩаԥысит Аԥсны Ахадеи Ваге Петросиан напхгара ззиуаз Архангельсктәи аобласт аделегациеи реиԥылара

03.09.2021

Имҩаԥысит Аԥсны Ахадеи Ваге Петросиан напхгара ззиуаз Архангельсктәи аобласт аделегациеи реиԥылара

Имҩаԥысит Аҧсны Аҳәынҭқарра Ахада Аслан Бжьаниа Архангельсктәи аобласт агубернатор актәи ихаҭыҧуаҩ Вага Петросиан напхгара ззиуаз аделегациеи реиԥылара.

Аҳәынҭқарра Ахада асасцәа аҧсшәа раҳәо, иазгәеиҭеит атәыла анапхгара Урыстәылатәи Афедерациа асубиектқәеи дареи реимадара иамоу аҵак ду.

"Урыстәылатәи Афедерациа  аганахьала Аҧсны азхаҵара - ари ҭоурыхтә шьаҿоуп, атәылауаа ҧхьаҟа аҿиаразы аҭагылазаашьа рзаҧнаҵеит, арҭ аизыҟазаашьақәа иҵегьы ихаҳарҭәаар ҳҭахуп, ари аганахьала иҟаҵатәу ыҟоуп. Шәара шәаара лагаламҭа дуны сахәаҧшуеит ари аус аҟны", - иҳәеит иара.

Ваге Петросиан Аҧсны Ахада ҭабуп ҳәа иаиҳәеит асасдкыларазы, иҳәеит аделегациа раара хықәкыс ишамоу хырхарҭа рацәала Аҧсынтәыла аус ацура, аимадара арҭбааразы амҩа ҿыцқәа рыҧшаара. Петросиан Архангельсктәи агубернатор иааицҳаз аҳәарала Аслан Бжьаниа Архангельскҟа ааҧхьара ииҭеит
Аԥсны Ахадеи Ваге Петросиан напхгара ззиуаз Архангельсктәи аобласт аделегациеи

Анаҩс имҩаԥысит аусуратә еиԥылара. Уи иалахәын аԥсуа ган аҟнытә: Ахада Иадминистрациа Анапхгаҩы ихаҭыԥуаҩ аамҭала инапынҵақәа назыгӡо Валери Папба, аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа, Аҟәа ақ. Администрациа ахада Беслан Ешба. Урыстәылатәи аган аҟнытә: Аԥсны иҟоу Урыстәыла Ацҳаражәҳәаҩ Алексеи Двинианин, Архангельсктәи аобласт агроааглыхратә комплекси ахәаахәҭреи рминистр Ирина Бажанова, амуниципалтә ҵараиура  «Ақалақь Архангельск» ахада Дмитри Морев, АУ «Аҳаиртә баӷәаза Архангельск» адиректор хада Александр Распечениук.

Аиԥылараҟны аганқәа аусеицуразы еиуеиԥшым ахырхарҭақәа ирылацәажәеит, аимадарақәа рырҿиареи рырӷәӷәареи зҿлымҳара шарҭо шьақәдырӷәӷәеит.  
Аиԥылара ахыркәшамҭаз алахәцәа агәаларшәагатә ҳамҭақәа еимырдеит.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org