Аҧсны Аҳәынҭқарра Ахада

 

Ахада Чечентәыла Ареспубликаҟынтә аделегациа идикылеит

30.08.2021

Ахада Чечентәыла Ареспубликаҟынтә аделегациа идикылеит

Аԥсны Аҳәынҭқарра Ахада Аслан Бжьаниа агәабзиарахьчара аминистр Елҳан Сулеиманови амилаҭтә политикеи, адәныҟатәи аимадарақәеи, акьыҧхьи аинформациеи рзы аминистр Аҳмед Дудаеви зхадараҿы иҟоу Чечентәыла Ареспубликаҟынтә аделегациа идикылеит. Аиҧылара далахәын Аҧсны агәабзиарахьчара аминистр Едуард Быҭәба.

Аслан Бжьаниа асасцәа аҧсшәа раҳәо, Чечентәыла Ареспублика анапхгареи ачечен жәлари иҭабуп ҳәа реиҳәеит акыршықәса раахыс Аҧсны иарҭо адгыларазы,  апандемиа иаҿагыланы ақәҧараҟынгьы убрахь иналаҵаны.

"Агәаҟра ыҟоуп, агәаҟра аныҟоу зегьы ҳаидгылароуп. Хымҧада, ачымазара ҳаиааиуеит, агәра згоит ҳаҧхьа ахҭыс бзиақәа шаҳзыԥшу", - иҳәеит Ахада.
Иара убас, Ахада иазгәеиҭеит Чечентәыла Ареспублика Ахада Рамзан Кадыров Аҧсныҟа иаара дшазыҧшу.

Аҳмед Дудаев Чечентәыла Ареспублика ахада Рамзан Кадыров ихьӡала аԥсуа жәлар зегьы Аԥсны Жәларбжьаратәи азхаҵара амш рыдиныҳәалеит.

«Чечентәыла Ареспубликаҟны ҳара ҭоурыхлеи культуралеи ибеиоу аԥсуа жәлар бзиа иаҳбоит, ҳаҭыр рықәаҳҵоит. Акраҵанакуеит ҳара ҳзы иҳабжьоу аиашьаратә еизыҟазаашьақәа. Иаҳдыруеит аԥсуа жәлар еиуеиԥшым аамҭақәа рзы ахьыԥшымра амҩаҟны изыниаз ауадаҩрақәа», – иҳәеит Дудаев. Уи иҳәеит иара убас аԥхьаҟа Аԥсни Чечентәылеи ирыбжьоу аконструктивтә, аиҩызаратә еизыҟазаашьақәа ӷәӷәахалоит ҳәа игәы ишаанаго.  

Ари аԥхьа адырра шыҟаз еиԥш, Аслан Бжьаниеи УА аҳәынҭқарратә Дума адепутат   Адам Делимханови реиҿцәажәара иалҵшәаны Аԥсны ҳамҭас иаҭахоит еиҭа ацхыраара ласы амашьынақәа ҩба, Чечентәыла агәабзиарахьчара аминистр ишааицҳауала, амашьынақәа аҳәааҟны иааихьеит, мышқәак рыла ара аҭыԥаҟны иҟалоит.
  
Аслан Бжьаниа иара убас далацәажәеит чечентәылантәи аҿар аԥхын Аԥсныҟа ԥсшьара рааразы алшара аиҿкаара азхәыцра, ари Аԥсни Чечентәылеи рҿар реибадырреи реиҩызареи иацхраауеит.  

«Ҳазхәыцроуп ҽааны ари шеиҿаҳкааша. Ҳхәыҷқәа еибабалааит, еиҿцаалааит, избанзар ҳара ҳакра, ҳаиҩызара, ҳаиашьарала ҳгәы дууп», – иҳәеит Бжьаниа.
Аиԥылара ахыркәшамҭаз уи иалахәыз агәалашәаратә ҳамҭақәа еимырдеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org