Аҧсны Аҳәынҭқарра Ахада

 

Ахада аилацәажәара мҩаԥигеит иактуалтәу азҵаарақәа жәпакы ирызкны

20.08.2021

Ахада аилацәажәара мҩаԥигеит иактуалтәу азҵаарақәа жәпакы ирызкны

Иахьа Аԥсны Аҳәынҭқарра Ахада Аслан Бжьаниа имҩаҧигеит актуалра злоу атәыла аҧсҭазаара азҵаатәқәа жәпакы ирызкыз аусуратә еилацәажәара.

Аилацәажәараҟны ирзааҭгылан Аҧсны иҟоу аепидемиологиатә ҭагылазаашьеи коронавирус аламырҵәаразы ауснагӡатәқәа, афымцасистема аҭагылазаашьа, изакәанымкәа акриптовалиута аиура ааанкылара, иара убас аҧсабаратә рыцҳара иҟанаҵаз аҧхасҭа аҧыхра иазкыз азҵаарақәа.
  
Аилацәажәара иалахәын Ахада Иадминистрациа анапхгара, Аминистрцәа  реилазаара алахәцәа, аҳәынҭқарратә еилахәырақәа рнапхгаҩцәа.

"Амшынеиқәафымцамч" адиректор хада ин.н. Ҭенгьыз Гырџьынба далацәажәеит ари аусхк аҟны иҟоу аҭагылазаашьа атәы. Уи иажәақәа рыла, ҳазҭагылоу аамҭазы уахыки-ҽнактәи афымцамч ахархәара 5 млн квт еиҳауп, ари 500 квт  рыла иара анорма еиҳауп. Гырџьынба излазгәеиҭаз ала, афымцамч ахархәара ашьҭыҵра аҧсшьара аамҭа ишамадоу еиԥш, егьыс уи ахархәарагьы еиҳахеит.

Аекономика аминистр ихаҭыԥуаҩ Ҭемраз Амқәаб иазгәеиҭеит Аҧсны ахьынӡанаӡааӡо 4700 цыра амаинингтә аппаратқәа шаҿыху, урҭ рахьтә 1100 цыра Аҧсны анҭыҵ ишалгоу. Аусӡбарҭа азыӡбала 600 нызқь мааҭ инарзынаԥшуа ахараҧса шәоуп. Аусӡбаратә усеилыргараҿы иҟоуп 14 млн. инареиҳаны зҵазкуа ашшрақәа.
Аҳәынҭқарра Ахада аиҳабыра ирыдиҵеит жьҭаарамзанӡа афымцастанциақәа рырҽеиразы аинвесторцәа злахәхо аиқәшаҳаҭрақәа рыпроектқәа разырхиара.
Аслан  Бжьаниа агәынамӡара ааирҧшит ари ахырхарҭала аусура амҩаԥысшьазы.

Анаҩс, иазааҭгылан ҧхынгәымза 4 рзы, ԥхынгәымза 26 ауха, нанҳәамза 16 рзы аҭыҧ змаз аҧсабаратә рыцҳара атәылауаа ирнаҭаз аҧырхага, аԥхасҭа зауз ауааԥсыра ацхыраара рыҭара азҵаара.

Аҧыза-аминистр далацәажәеит амшцәгьа ахҟьа-ԥҟьақәа рымҽхак ашьақәыргылара апроцесси аԥхасҭа зауз ауааҧсыра ацхыраара рыҭареи шымҩаԥсыуа атәы.  
А. Анқәаб иажәақәа рыла, аҧшабааԥс иҟанаҵаз аԥхасҭа иартәеит 80 млн. мааҭ, иблыз аҩнқәа хҧеи, 19 машьынеи аламҵакәа. Амшцәгьа аԥхасҭа рнаҭеит зынӡа 231 ҩны. Иахьазы ацхыраара рыҭаразы 4 млн. мааҭк рызшәоуп Гәылрыҧшь араион ауааԥсыра.

Ақәыршҩқәа раан аԥхасҭа роуит 242 обиект. Иҟалаз аԥхасҭа амҽхак ашьақәыргылара макьанагьы имҩаԥысуеит. Иазгәаҭан аҳәынҭқарра арыцҳара иақәшәаз ауаа ацхыраара рыҭаразы иалшо зегьы шыҟанаҵо.  

  COVID-19 иаҿагыланы ақәԥареи коронавирустә ҿкы аламырҵәареи рзы ауснагӡатәқәа ртәы далацәажәеит агәабзиарахьчара аминистр Едуард Быҭәба.
Уи ишиҳәаз ала, аҵыхәтәантәи амшқәа рзы иҟоу астатистика ачымазара маҷк аԥсыҽхара ишаҿу аныԥшуеит.  

Аҳәынҭқарра амчала стационарла ачымазцәа рыхәышәтәразы 500 каруаҭ-ҭыԥ еиҿкаауп. Ахәԥса акырӡа ишеиҳахазгьы, аҵәыҵәри аахәара еиԥҟьарада имҩаԥысуеит. Иазгәаҭан Аԥсны Афизика-техникатә институт аҟны аҵәыҵәри аарыхра аиҭашьақәыргыларазы аусусрақәа шымҩаԥсыуа атәы.

Аилацәажәараҟны иазааҭгылан ауаажәларра рыҩныҵҟа аимак рацәаны изхылҵыз  Гәдоуҭатәи ахәшәтәырҭаҟны иҟоу акомпиутертә томограф иадҳәалоу азҵаарагьы.  
Аԥыза-министр Александр Анқәаб иазгәеиҭеит акомпиутертә томограф ҿыц аахәара аҭахны ишыҟоу азы ипозициа шышьақәирӷәӷәо. Убри аан, уи иҳәеит Акоординациатә штаб аилатәараҟны иҟаиҵаз аҳәамҭаҟны аҽԥынкыла шаламыз, аппарат ахә зшәаз аԥсуа наплакҩцәа ргәы нзырхаша ажәагьы шимҳәаз. «Сгәаанагарала, аҭиҩы аахәаҩ дирҩашьеит ауп»,- иҳәеит иаҵшьны аԥыза-министр.

Ахада Иадминистрациа Анапхгаҩы Алхас Кәыҵниа иҳәеит анаплакҩцәа аԥыза-министр Акоординацитә штаб аҟны иҟаиҵаз аҳәамҭазы ргәынамӡара еилукаартә ишыҟоу. Иаахжәаны аҳәамҭа ҟаҵан ҳәа.

Ахада амеценытцәа рганахьала иҭабуп иҳәеит аамҭа цәгьа ҳанҭагылаз иҟарҵаз ацхырааразы. Аҳәынҭқарра Ахада иҳәеит Гәдоуҭатәи ахәшәтәырҭаҟны иҟоу акомпиутертә томограф аиҭашьақәыргылара шаҭаху, агәабзиарахьчара аминистр инапы ианиҵеит иаарласны аилахәыреи дареи аиқәшаҳаҭра рыбжьарҵарц атомограф аусуразы иаҭаху ахәҭақәа адгаларазы.  

Убри аан Ахада ари аҩыза амыруга атәыла егьырҭ амедицинатә усҳәарҭақәагьы ишырҭаху азгәаҭаны, иҳәеит акомпиутертә томограф ҿыц аахәаразы аԥара аԥшаара нап шарктәу.
  
Аилацәажәараҟны ирзааҭгылан егьырҭ, иактуалтәу азҵаарақәа жәпакы.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org