Аҧсны Аҳәынҭқарра Ахада

 

Ахада Ашәарҭадара Ахеилак аилатәара мҩаԥигеит

22.07.2021

Ахада Ашәарҭадара Ахеилак аилатәара мҩаԥигеит

Аԥсны Аҳәынҭқарра Ахада Аслан Бжьаниа Ашәарҭадара Ахеилак аилатәара мҩаԥигеит.

Амшхәаԥштә аҟны иқәгылан аепидемиологиатә ҭагылазаашьеи азинхьчаратә система аиҭакреи ирызку азҵаарақәа.  


Аилатәарахь ааԥхьара рыҭан агәабзиарахьчара аминистр  Едуард Быҭәба,  аҭагылазаашьа ҷыдақәа рзы аминистр Лев Кәыҵниа, ареспублика асанитартә ҳақьым хада Лиудмила Скорик.

Агәабзиарахьчара аминистр Ашәарҭадара Ахеилак алахәцәа адырра риҭеит иҟоу аҭагылазаашьеи короновирустә ҿкы алаҵәара аҿагылара иазку ауснагӡатәқәеи рзы.
Аминистр иазгәеиҭеит атәылаҟны Covid-19 алаҵәара аизҳара инамаданы ахәшәтәырҭақәа рыҟны ашьҭаҵарҭа ҭыԥқәа рыцҵара аҭахны ишыҟоу. Едуард Быҭәба излеиҳәаз ала, ианаҭахха ачымазцәа иаарласны рыдкыларазы Аҟәа ақ. онкоцентр аҿы 40 ҭыԥ шазырхиахо.  

Аҳәынҭқарра Ахада иҳәеит Урыстәыла анапхгареи иареи реиҿцәажәарала Аԥсныҟа еиҭа ишаашьҭхо 150 ҭыԥ змоу амобилтә хәшәтәырҭа, ари азы аиқәшаҳаҭра шалыршоу.  

Ахада адҵа риҭеит Аԥыза-министр Александр Анқәаб, Ахада Иадминистрациа Анапхгаҩы Алхас Кәыҵниа Атәылахьчара аминистрреи Агәабзиарахьчара аминистрреи ақәыршаҳаҭны ҩымш рыҩныҵҟала ахәшәтәырҭа ахьыргылатәу аҭыԥ ылырхырц, иааԥхьахо арратә хәышәтәҩцәа нхарҭа ҭыԥла реиқәыршәаразы аҭагылазаашьа аԥырҵарц.

Аслан Бжьаниа иазгәеиҭеит иаҭаху алшарақәа зегьы шыԥшаахо амобилтә хәышәтәырҭа аиҿкааразы, иара убас Гәдоуҭатәи ахәышәтәырҭа, Аҟәатәи аҿкычымазара ахәышәтәырҭа, Аԥсны иҟоу егьырҭ ахәышәтәырҭақәа рызгьы.

Аҳәынҭқарра Ахада Александр Анқәаб инапы ианиҵеит Covid-19 ачымазара зыхьуа рзы зыхәԥса ҳараку ахәшәқәа раахәара ҷыдала хылаԥшра аҭара.

Аԥыза-министр Александр Анқәаб иажәақәа рыла ҳазҭоу ашықәс азы коронавирустә ҿкычымазара иаҿагыланы ақәԥара ишазоужьу 197 млн мааҭ.

Аслан Бжьаниа иҳәеит Урыстәылатәи Афедерациа  Администрациеи иареи иааԥмырҟьаӡакәа аимадара шрыбжьоу Аԥсныҟа авакцина Спутник-V аҩбатәи апартиа аагара азҵаара ианамаданы.  «Абри азҵаараҟны ҳара ԥыжәара ҳаҭоуп, уи лассы иӡбахоит», - иҳәеит аҳәынҭқарра Ахада.

Ашәарҭадара Ахеилак аилатәараҟны иазгәаҭан ҳҳақьымцәа русура иабзоураны ачымазара еиҳа лассы алгара аҟазшьа аиуа ишалагаз.

Ахада Аԥыза-министр идиҵеит хара имгакәа Акоординациатә хеилак аилатәара мҩаԥганы аус зуа аԥкратә уснагӡатәқәа рымҩаԥгаразы ажәалагалақәа разырхиара.

Ашәарҭадара Ахеилак алахәцәа иара убас иалацәажәеит егьырҭ актуалра змоу азҵаарақәагьы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org