Аслан Бжьаниа дазхиоуп аполитикатә мчрақәа зегьы рыҿцәажәара ауаажәларра рҿы аҭынчра ашьақәыргылареи атәыла аизҳазыӷьареи рзы

Аԥсны Аҳәынҭқарра Ахада Аслан Бжьаниа дазхиоуп аполитикатә мчрақәа зегьы рыҿцәажәара ауаажәларра рҿы аҭынчра ашьақәыргылареи атәыла аизҳазыӷьареи рзы. Абри атәы аҳәоит Аԥсны Аҳәынҭқарра Ахада ипресс-маҵзура,  ахәаша, жәабранмза 26 рзы иҟанаҵаз ахҳәааҿы.

    ***
Аԥсны Аҳәынҭқарра Ахада Аслан Бжьаниа ипресс-маҵзура иҟанаҵаз Ахҳәаа:

2021 шықәса жәабранмза 23 рзы  Аԥсны Аҳәынҭқарра Ахада ихаҭыԥуаҩ Б.З. Гәынба ихантәаҩрала имҩаԥысит  аполитикатә партиақәеи, ауаажәларратә еиҿкаарақәеи, амилаҭтәи аконфессиатә еилазаарақәеи, еицырдыруа ауаажәларра-политикатә усзуцәеи злахәыз аилатәара.

Ара иалацәажәан  Аԥсны Аҳәынҭқарра Ахада иҟны Ауаажәларратә хеилак аԥҵара иазкыз аидеиа. Ас еиԥш иҟоу аилабжьаратә усбарҭа аԥҵахар,  уи ахықәкы хадақәа ируакхоит аполитикатә партиақәеи, ауаажәларратә еиҿкаарақәеи, егьырҭ ауаажәларратә еилазаарақәеи аҳәынҭқарратә усбарҭақәеи рыбжьара аконструктивтә еиҿцәажәарақәа  рымҩаԥгара.  

Иазгәаҳҭоит, атәыла анапхгара Ауаажәларртә хеилак аԥҵаразы иҟанаҵаз аԥшьгара рыбжьы шақәдыргаз, шамахамзар, аполитикатә партиақәеи ауаажәларратә еиҿкаарақәа зегьи. Рыцҳарас иҟалаз, аизара аусура аҽалархәра мап ацәнакит ауаажәларратә еиҿкаара «Аидгылара»,  аҳәамҭагьы аладырҵәеит мап зацәыркыз аҽыҵга арбаны, уи акыр иџьаушьартәгьы иҟоуп.

  Раԥхьатәи амзызқәа ируакуп Аԥсны Аҳәынҭқарра Ахада 2020шықәса ԥхынҷкәынмза 25 рзы имҩаԥигаз алхрақәа раан адгылара изҭаз апартиақәеи аиҿкаарақәеи рхаҭарнакцәа алархәны имҩаԥигаз аизара.

Аҳәамҭа авторцәа ргәаанагарала, уи иаанаго «Ахада аԥхьаҟа ажәлар реиҩшареи  ауаажәлаара реидыслареи рымҩа ылихит» -ҳәа ауп. Ас еиԥш агәаанагара ашьақәырӷәӷәара иашам ҳәа иҳаԥхьаӡоит. Уи ус шакәугьы шьақәнарӷәӷәоит  Аслан Бжьаниа Аҳәынҭқарра Ахада имаҵурахьы даннеи, аиҳабыра реилазаара ашьақәырӷәӷәараан аиҳабыра ԥасатәи реилазаара ахәҭа дук, Рауль Ҳаџьымба атәыла Ахадас даныҟаз аамҭазы аус зуқәоз рмаҵзуратә ҭыԥқәа рыҟны русура иацырҵартә аҭагылазаашьа ахьаԥҵаз афакт:

Даур Ақаҩба - Адәныҟатәи аусқәа рминистр,
Лев Кәыҵниа - Аҭагылазаашьа ҷыдақәа рзы  аминистр,
Ҭамаз Ҵахнакиа - Агәабзиарахьчара аминистр,
Руслан Аџьба - Асоциалтә еиқәыршәареи адемографиатә политикеи рминистр,
Савели Ҷыҭанаа - Аекологиа азы аҳәынҭкарратә еилакы ахантәаҩы,
Кама Гогиа - Астатистиказы аҳәынҭқарратә еилакы ахантәаҩы.
Ааигәанӡа рмаҵзуратә ҭыԥқәа рҟны рнапынҵақәа нарыгӡон Ашәахтәқәеи аизгатәқәеи рзы аминистр Даур Кәырмазиа,  Аҳазалхратә ҳәынҭқарратә еилакы ахантәаҩы Гәырам Инаԥшьба.  

Иазгәаҭатәуп ҳәа иҳаԥхьаӡоит, Гәырам Инаԥшьба, Ахада аҳазалхратә маҵзура аинрал-маиор ҳәа ахьӡ шихиҵаз, Ашәахтәқәа аизгатәқәеи рзы  аминистрра амаҵзура шидгалаз, аха мап шацәикыз. Иусура иациҵоит ԥасатәи Ахада ихаан аахыс аус зуа апрокурор хада Адгәыр Агрба.

Ара ҿырԥштәқәак роуп иааҳгаз, ҳара ҳгәаанагарала, Аҳәынҭқарра Ахада иганахьала «ажәлар реиҩшара амҩа ылихит» - ҳәа иҟаҵоу авба ҵаҵӷәыдоуп. Ауаажәларратә еиҿкаара «Аидгылара»  иҟанаҵаз ааԥхьара ҳазыхынҳәуа, иахәҭаны иҳаԥхьаӡоит ԥхцынҷкәынмза 25 рзы аизара шымҩаԥысыз аполитикатә партиақәеи ауаажәларратә еиҿкаарақәеи раԥхьагылаҩцәа раԥшьгарала. Убри азы иҟаҵан аофициалла  ааԥхьара, уи ус шакәыз шьақәирӷәӷәеит Ахада ихаҭыпуаҩ имҩаԥигаз аиԥылараҟны  апартиа «Аиҭаира» аԥхьагылаҩ  Леонид Лакербаиа.

Ҳарҭ аилкаара ҳцәыуадаҩуп аполитикатә еиҿкаарақәа рхаҭарнакцәа злахәыз аиԥылара ауаажәларра реидыслареи реиҟәшареи иаԥырхагоуп ҳәа иҟоу агәаанагара. Аҳәынҭқарра Ахада азин имоуп аполитикатә еиҿкаарақәа ргәыԥ аԥылареиԥш, аполитикатәи ауаажәларратәи усзуҩцәа хаҭалагьы рԥылара. Аҳәынҭқарра Ахада илшоит  хазы атәылауаҩы  иԥыларагьы. Уи иаанагаӡом, егьырҭ атәылауаа зегьы, ауаажәларратә еиҿкаарақәа, апартиақәа, урҭ рхыԥхьаӡараҿы аоппозициаа, аҳәынҭқарра азҵаара хадақәа рыӡбара иалхәдаауп ҳәа.

Иҳәатәуп ҳәа иҳаԥхьаӡоит Аԥсны Ахада Аслан Бжьаниа аоппозициа даԥхьагылаҩны даныҟаз «инеиԥынкыланы, идырны Ахада иҟны иҟаз аилабжьаратә еиҿкаара аԥҵара даҿагылан» ҳәа иҟоу агәаанагара аиаша ишацәыхароу.  

Ԥасатәи Ахада иҟны иҟаз аилабжьаратә хеилак алахәра мап ацәкра мзызс иамаз азы Аслан Бжьаниа аинтервиу аҟны иаартны иҳәахьан изныкымкәа.  Уи ҵакыс иамаз аоппозициатә мчқәа реидгылара иалахәыз аиҿкаарақәа ԥшьба рахьтә Ахеилак аусурахь аиҿкаарақәа хԥа алкааны ааԥхьара ахьрырҭаз ауп.    Аоппозициатә блок иалахәыз "Аҳәса аполитикаҟны" захьӡу ауаажәларратә еиҿкаара Ахеилак аилазаара алаҵаразы аоппозициа иҟанаҵаз аҳәара аиҳабыра амчхара иаднамкылеит.  Алаҳәара авторцәа ибзианы ирдыруеит Ауаажәларратә хеилак аԥҵара иазкны Ахада ихаҭыԥуаҩ  Бадра Гәынба имҩаԥигоз аилацәажәарахь неилых ҟамҵакәа аиҿкаарақәа зегьы ааԥхьара шрымаз.  «Аидгылара» иҟанаҵаз аҳәамҭа иара убас иаҳәоит «ауаажәларратә еиҿкаара "Аидгылара"  ааԥхьарақәеи «Автомашьынатә Аужьратә Пункт "Адлер" аҟны ҳаиҿкаара алахәцәа рынкылара афактқәеи хырҩа шрыҭамыз» атәы.   Ишәгәалаҳаршәар ҳҭахуп,  2021 шықәса ажьырныҳәамза 27 рзы   «Аидгылара» ҵаҵӷәыда аҳәынҭқарра Ахада ахара идҵаз азы Ахада ипресс-маҵзура  ахҳәаа шыҟанаҵаз иҟаз аҽԥынкыларақәа зегьы зырҵабыргуа аматериалқәа зегьы азинхьчаратә усбарҭақәа рахь анагаразы ааԥхьаразы. Аха иахьа уажәраанӡа уи ҟаҵаӡам.
  
Аилацәажәара алахәра мап ацәкразы мзызс иҟаҵоу Аиҿкаара «Аидгылара» Ахада ихьӡала иқәнаргылаз 33 зҵаара инамаданы, Ахада импресс-маҵзура ахы иаднаҵоит урҭ рҭакқәа хара имгакәа ишыҟаҵахо азы, Икьыԥхьхоит АИХ рыҟны.

Хыхь иҳәоу инамаданы, даҽазныкгьы аҳәамҭа ҟаҳҵоит «Аидгылара» зыӡбахә аҳәо амзызқәа хыҭхәыцаароуп, ауаажәларратә еиҿкаара аконструктивтә диалог аҽалархәра аҭахӡам ҳәа.

Иџьаушьартә иҟоуп иара убас ажурналистцәа  аилатәара ашьҭахь Аԥсны жәлар ракзаара афорум апартиа аԥхьагылаҩ Аслан Барцыц иҟаиҵаз ахҳәаагьы.
Уи иажәақәа рыла, «насыԥ иман ҳәа иԥхьаӡон ас еиԥш иҟоу аиԥылара шықәсык аԥхьа имҩаԥгазҭгьы, аамҭа ҳацәцеит».

Иазгәаҭатәуп, шықәсык аԥхьа атәыла напхгара азҭоз даҽаӡәын. Иҟалап Афорум анапхгаҩы аҳәынҭқарра Ахада ҿыц иахагылара аахыс иҵыз   ииасыз 10 мыз ракәзар зыӡбахә имоу. Ус анакәха, азҵаара цәырҵуеит аԥхьагылаҩ ари аамҭа зегьы атәылаҟны адунеи зегьы аҟнеиԥш аԥкрақәа шыҟаз, ас еиԥш аиԥыларақәа рымҩаԥгара шалымшоз.  Апандемиа иахҟьаны иаанкылан адунеитә саммитқәа, жәларбжьаратәи аиҿкаарақәа реилатәарақәа, егьырҭ афорумқәа. Аслан Барцыц иажәақәа рыла, аоппозициатә мчқәа, ҷыдала, Ахадарахьы акандидатс иқәгылаз Адгәыр Арӡынба Ахада «адыррақәа ииҭон». Ҿырԥшыс иааигеит Адгәыр Арӡынба Владимира Путин иҟаиҵаз ааԥхьара ала дицны Москваҟа Аиааира Апарад ахь ицара».

Ихәатәуп ҳәа иҳаԥхьаӡоит, ауаажәларраҟны иҟоу аиҿагылара аиааира иазку ашьаҿақәа ҟазҵоз Ахада шиакәыз. Иаҳҳәап, Ахадарахьы ԥасатәи акандидат Аиҳабыра иалаҵаразы ажәалагала ҟаҵан. Ауаажәларра реидкыларазоуп Аслан Бжьаниа аофициалтә делегациа Адгәыр Арӡынба дзалаиҵазгьы.

Иазгәаҭатәуп, Аиааира Апарад ахь ааԥхьара змаз Аԥсны Ахада Аслан Бжьаниа шиакәыз, Адгәыр Арӡынба ааԥхьара изҭазгьы Аслан Бжьаниа шиакәу. Аԥснытәи аделегациа аилазаара далахәхар алшон дарбанзаалак ауаажәларратә, аполитикатә усзуҩы.  Ари аҭагылазаашьа иаҵшьны аҳәара ҳалагомзыт Афорум аԥхьагылаҩ афактқәа еилаимгазҭгьы.  

Даҽазныкгьы аҳәамҭа ҟаҳҵоит Ахада Аслан Бжьаниа аполитикатә мчқәа зегьы алархәны адиалог амҩаԥгара дшазхиоу ауаажәларра рыҩныҵҟа аҭышәынтәалара, атәыла аизҳазыӷьара ахьӡала.    

Ахыҵхырҭа: https://apsnypress.info/ru/item/2500-aslan-bzhaniya-gotov-k-dialogu-so-vsemi-politicheskimi-silami
© АԤСНЫПРЕСС


Возврат к списку