Аслан Бжьаниа: «Ҳазҭагылоу аамҭазы акриптовалиутақәа рмаининг аусура ҟалашьа амаӡам»


Аԥсны Аҳәынҭқарра Ахада Аслан Бжьаниа Аԥснытәи аҳәынҭқарратә телехәаԥшра иаиҭаз аинтервиу аҟны иазгәеиҭеит ақалақьқәеи араионқәеи рхадацәа данрацәажәа анаҩс, Аԥсны изакәаным амаинингқәа раарԥшразы агәаҭаратә усмҩаԥгатәқәа лассы-лассы имҩаԥырго ишалагаз.
  
Аҳәынҭқарра Ахадеи Аԥыза-министр ин.н. агәаҭаратә усмҩаԥгатәқәа рхы рыладырхәуеит.  

«Ауаажәларраҟны иҟоуп агәаанагара ареспубликаҟны аамҭа-аамҭала алашара арцәара изакәанымкәа акриптовалиута арҳара иазку афермақәа ирго афымцамч ишадҳәалоу.  

Атәыла афымцамч ҩ-хырхарҭакны аусура алшаӡом. Урҭ узеиҿырԥшӡом», - иҳәеит Ахада.
  
Аслан Бжьаниа иҳәеит иара убас акриптовалиутақәа рмаининг ареспубликаҟны џьар-џьара иҟазар шауа, аха уи бзианы ишыҭҵаатәу.  
«Аԥсны ари аусхк аус аур ауеит, аха ҳазҭагылоу аамҭазы урҭ рымҽхаки ирфо афымцамчи рыла ҟалашаьа рымаӡам. Иалкаау аԥҟарақәеи азакәанқәеи шаԥаҳҵаз еиԥш, урҭ хьаҳәа-ԥаҳәарада рықәныҟәара аналҳарша, акриптовалиута арҳарагьы алшо иҟалоит»,- иазгәеиҭеит  А.Бжьаниа.

«Еилыскаауеит аӡәырҩы ари аус ахарџь маҷымкәа ишақәдырӡыз, аха иахьа уи ҟалашьа амамзароуп. Ари аламыс, алеишәа иаҵанакӡом, аӡәы амал ирҳауа, егьи иҩны алашареи аԥхарреи игны»,- иҳәеит Ахада.

Аслан Бжьаниа иажәақәа рыла, изакәанымкәа акриптовалиута арҳара аҿагылара шымҩаԥысло атәылаҟны афымцамч аҭагылазаашьа ҭышәынтәалаанӡа.  
«Ақалақьқәеи ақыҭақәеи ҳрылалоит. Алҵшәа ҟалоит. Ас еиԥш аусура макьана имҩаԥгаӡам, избанзар ари згәамԥхо, иаҿагыло ҟалоит. Уи аиҳабыра рыхьӡ шьҭнахуам, аха уи ҳақәныҟәаӡом, ҳхахьы иааҳгаӡом ҳара. Ҳара инеиԥынкыланы ҳусура алҵшәақәа рзы ҳауаажәлар адырра раҳҭалоит», - иазгәеиҭеит ареспублика ахада.  


Возврат к списку