Аҧсны Аҳәынҭқарра Ахада

 

Ахада Гагратәи абжьаратәи ашкол №1 аартра иазкыз аусмҩаҧгатә далахәын

01.09.2020

Ахада Гагратәи абжьаратәи ашкол №1 аартра иазкыз аусмҩаҧгатә далахәын

Аҧсны Аҳәынҭқарра Ахада Аслан Бжьаниа шьаҭанкылатәи аиҭашьақәыргылара ашьҭахь Хараз Чамагәуа ихьӡ зху Гагратәи абжьаратәи ашкол №1 аартра иазкыз аусмҩаҧгатә далахәын.

Аусмҩаҧгатә иалахәын иара убас аҧыза-министр ихаҭыҧуаҩ, аекономика аминистр Кристина Озган, Аҧсны иҟоу Урыстәыла ацҳаражәҳәаҩ Алексеи Двинианин, Гагра араион Администрациа ахада Иури Хагәышь, Аҧсны Жәлар Реизара – Апарламент адепутат Асҭамыр Аршба, ауаажәларра рхаҭарнакцәа.
Аҳәынҭқарра Ахада ашкол аҵаҩцәа, арҵаҩцәа, аҭаацәа  аҵарашықәс алагамҭа рыдиныҳәалеит.  

«Коронавирус аҿкы чымазара иахҟьаны шықәсыбжак инареиҳаны ашкол ахь аныҟәаразы алшара шәымаӡамызт. Уби аҟнытә иахьа ҷыдала шәгәы хыҭ-хыҭуа аҵарашықәс алагамҭа шәазыҧшуп.
Ҳәарада, ари аҵарашықәс ҧасатәи ашықәсқәа излармеиҧшхо ҟалоит. Зегьы ҳгәы-ҳҽанызароуп, амедициантә усзуҩцәа рабжьгарақәа ҳрықәныҟәалароуп. Аамҭала ашколтә усмҩаҧгатәқәа, аспорттә еицлабрақәа уҳәа рымҩаҧгара мап рцәаҳкыр акәхоит. Аха агәра ганы ҳаҟоуп, ари зегьы аамҭала шакәхо, арҭ ауадаҩрақәа ҳариааины иаабац ашколтә ҧсҭазаара азыхынҳәразы аҭагылазаашьа шыҟало», - иҳәеит Аслан Бжьаниа, аусмҩаҧгатә иалахәыз ихы рықәкны.  
Ахада иқәгылараҟны иҭабуп реиҳәеит Урыстәылатәи Афедерациа анапхгара Аҧсны асоциалтә-економикатә ҿиара аинвестициатә программа аҳәаа иҭагӡаны иҟарҵо адгылареи ацхыраареи рзы.  
Гагра араион Администрациа ахада Иури Хагәышь ашкол аҵаҩцәеи ақалақь ауааҧсыреи Адырра амш рыдиныҳәалеит:
«Аҧсны асоциалтә-економикатә ҿиара аинвестициатә программа аҳәаа иҭагӡаны Урыстәылатәи анапхгара иҟанаҵо ацхыраара иабзоураеит абри ашкол аргыларазы аҧара азоужьра», - иаҵшьны иҳәеит Иури Хагәышь.

Ашкол ҿыц аҵараиура ахан ҳәа азиҳәеит аҵареи абызшәатә политикеи рминистр Инал Габлиа:
"Ари хәызмаӡам ҳамҭоуп, цхыраароуп абиҧара ҿыцқәа рзы", - иҳәеит аҵараиуратә усҳәарҭа ахада.  

Ашкол аартра иазкыз аусмҩаҧгатә аҳәаақәа ирҭагӡаны ашкол аҭӡы аҟны ишьақәыргылоуп иара ашьаҭаркра зыхьӡ адҳәалоу Хараз Чамагәуа изку амемориалтә ҕәы.

Аҵареи абызшәатә политикеи рминистр Инал Габлиа, Гагра араион Администрациа ахада Иури Хагәышь, ашкол адиректор Хана Гәынба ахыбра ҿыц аартра иазҳәаз алента ҧырҟеит.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org