25.06.2019
Аҧсны Аҳәынҭқарра Ахада Рауль Ҳаџьымба инапы аҵаиҩит Аҧсны аҳәынҭқарратә бызшәа арҿиара иазку ахықәкытә программа апроект азырхиаразы Адҵа анагӡара ҿҳәарас иаҭаны 2020-2022 шш.
Адокумент аҟны, ҷыдала, иҳәоуп:
«1994 ш. абҵара 26 рзы ирыдыркылаз Аҧсны Аҳәынҭқарра Аконституциа (№ 187-с) ахәҭаҷ 53, иара убас 2007 ш. абҵара 29 рзы ирыдыркылаз “Аҧсны Аҳәынҭқарра аҳәынҭқарратә бызшәа азы” Азакәан (№ 1891-с-IV) инақәыршәаны, Аҧсны Аҳәынҭқарра аҳәынҭқарратә бызшәа арҿиара иазкны иаладырҵәо аусмҩаҧгатәқәа рымҽхак арҭбаара хықәкыс иҟаҵаны, Аҧсны Аҳәынҭқарра Аминистрцәа Реилазаара ирыдҵазааит:
–2019 ш. ҧхынҷкәын 1-нӡа ҿҳәарас иаҭаны иазырхиазарц, насгьы иазыҧҵәоу ҧҟарала ахәаҧшразы инагазарц аҳәынҭқарратә хықәкытә программа – Аҧсны Аҳәынҭқарра аҳәынҭқарратә бызшәа арҿиаразы (уи анагӡара 2020–2022 шш. ҿҳәарас иаҭаны) (анаҩсан – Апрограмма апроект);
–2019 ш. ҧхынгәы 20-нӡа (Апрограмма апроект иаартны алацәажәаразын) ишьақәырҕәҕәазарц Апрограмма апроект азырхиаразын акомиссиа аилазаара, аҵарауаа рхеилаки (аекспертцәеи, аспециалистцәеи) Апрограмма апроект аус адулара апроцесс иадыҧхьаланы;
– 2019 ш. жьҭаара 1-нӡа ҿҳәарас иаҭаны, ахәаҧшразын инагазарц Апрограммеи, уи иахылҿиаауа апрограмма маҷқәеи, хазы иарбоу иарбанзаалакь апрограмматә усмҩаҧгатәқәеи (2020 шықәсеи, Апрограмма иамҽханакуа егьырҭ ашықәсқәеи ҿҳәарас ирзыҧҵәаны)».