Аҧсны Аҳәынҭқарра Ахада

Лаҵарамза 25 рзы Москва имҩаҧысит Ихьыԥшым Аҳәынҭқаррақәа Реиҩызара аусқәеи, евразиатәи аинтеграциеи аџьынџьуаа аҽрымадареи рзы Аҳәынҭқарратә Дума Аилак инарҭбаау аилатәара. Аҧсуа ган аҟнытә иалахәын Аԥсны Жәлар Реизара – Апарламент Аиҳабы ихаҭыԥуаҩ Асҭамыр Аршба, Аҳәынҭқарратә шәарҭадара амаҵзура ахантәаҩы Роберт Киут, адәныҟатәи аусқәа рминистр Инал Арӡынба, атуризм аминистр Ҭемраз Хышба, аекономика аминистр лхаҭыԥуаҩ Ҭемраз Амқәаб, адепутат Ерик Рштуни, Алиас Лабахәуа – АА Аҳәынҭқарратә ҳазалхратә еилакы ахантәаҩы актәи ихаҭыԥуаҩ.
Аиԥылараан  ирылацәажәеит аԥсны-урыстәылатәи аизыҟазаашьақәеи аԥсны-урыстәылатәи аҳәынҭқарратә ҳәаа ахысразы аԥҟарақәа рырмариареи ирызку азҵаарақәа.

Аиҿцәажәарақәа рҿы иара убас иазгәаҭан аԥсны-урыстәылатәи аҳәынҭқарратә ҳәаа ахысра зыруадаҩуа амзызқәа ируакны ишыҟоу 1995 шықәса рзы аҳәынҭқарратә ҳәаа ахысра иазку арбагақәа инарықәыршәаны иазҧхьагәаҭоу аконтроль-аужьратә пункт зда царҭа амам аужьратә лшара.
Аҧхынтәи акурорттә аамҭазы аҳәынҭқарратә ҳәаа иахысуа ауааҧсыреи атранспорттә хархәагақәеи рхыҧхьаӡара  аужьратә пункт апроекттә мчхара ҧшьынтә еиҳахоит.

2011 шықәсазы Аҧсны Аҳәынҭқарра Аиҳабыреи Урыстәылатәи афедерациа Аиҳабыреи рнапы аҵарҩит Ҧсоу аӡиас иху ацҳақәа реиҭашьақәыргылареи рыргылареи рзыАаиқәшаҳаҭра. Уи иазҧхьагәанаҭон ажәытәтәи автомашьына мҩеи уахь анеирҭақәеи реиҭашьақәыргылара, иара убас автомашьына цҳа ҿыци уахь анеирҭақәеи рыргылара.  Аиқәшаҳаҭра анагӡара аҳәаақәа ирҭагӡаны ацҳа ҿыци уахь анеирҭақәеи ргылан, ажәытә цҳа аиҭашьақәыргылара мҩаҧгамызт.
Аилатәара аихшьалақәа рыла, аганқәа еиқәшаҳаҭны ирыӡбеит Ҧсоу аӡиас аҟны аԥсны-урыстәылатәи аҳәынҭқарратә ҳәаа ахысра иазку ауснагӡатәқәа рымҩаҧгаразы аусуратә гәыҧ аҧҵара.
Аиҧылара мҩаҧысит аконструктивтә диалог аҟазшьа аманы. Иазгәаҭатәуп абри аан аҳәынҭқарратә ҳәаа аҧыхра азҵаара шышьҭыхым.